YETİM QIZIN HEKAYƏTİ
AZAD QARADƏRƏLİ
YETİM
QIZIN HEKAYƏTİ
(“Seçki
hekayələri” silisləsindən)
Yetim
qız idi. Atası öləndə üç yaşı vardı. Anasını isə heç xatırlamırdı. O doğulanda
zahılıqdan pozulmuş, bir ilin tamamında işıqlı dünyaya əlvida demişdi. Elə xəstə
idi ki, heç balasını əmizdirə də bilmədi. Yazıq nənəsi onu yumurta sarısı ilə
mayalamış, sonra on üç il əvvəl ailə qursa da, uşaqları olmayan qardaşı oğlunun
arvadının qucağına qoyub demişdi:
-Mərcan,
mən qocalmışam. Bu tifilin anası da bu gün, sabahlıqdı. Bədbəxt balam heç gün görmədi allahın altında. Götür bu uşağı,
saxla, böyüt, əli iş tutar, yardımçın olar...
Sonra
uşağı Mərcanın köynəyindən keçirmiş, qıçının arasına salıb çıxartmış, bir növ
quzunu yad qoyuna teləyən kimi teləmişdi...
İnsafən
Mərcan uşağa yaxşı baxmış, metrika götürəndə
anası Nisənin adını vermiş, ərinin soyadını yazdırmışdı...
Uşaq
aynan, gününən böyümüş, boy atmış, məməli-məstan qız olmuşdu. Bir az ağız-burun
sarıdan rəhmətlik atasına çəkmişdi: badar-bucaqdı. Burnu iriydi, ağzı yekə,
qulağı yastı, səsi də kişi səsi... Amma yanaqları pırtlaq, qıpqırmızı idi. Döşləri
baş yarardı. Dili də ki şipşirin! İlanı yuvasından çıxardardı. Məktəbdə hamı
ona Nisəm deyirdi, nədən ki, qız həm yaxşı oxuyurdu, həm də dilli-başlı idi.
Elə
siftə ili imtahanı uğurla verib köhnə dillə desək, APİ-nin coğrafiya fakültəsinə
qəbul olundu. İnstitutda da qızın başına and içirdilər. Yaxşı oxuduğuna görə
qırmızı diplomla bitirdi oranı.
Beşcə
il müəllim işləmişdi ki, qardaşı gənc yaşında parladı. (Allahın işinə baxın,
Mərcan bu qızı köynəyindən keçirəndən iki il sonra uşağa qaldı və nağıllarda
deyilən kimi, ay parçası kimi bir oğlan doğdu. Həmən bu oğlan ali məktəbdə
oxuya-oxuya idmanla məşqul oldu və taykvando üzrə dünya çempionu adını qazandı.
Hökümət ona ev, maşın verdi, institutu bitirəndən iki il sonra isə artıq
deputat da seçldi...)
Qardaşı
Eminə görə Nisəni az sonra irəli çəkib öz kəndlərindəki məktəbə direktor
qoydular. Və ilk ilindəcə Milli Məclisə seçkilər oldu. Nisənin məktəbindəki məntəqə
100 faiz nəticə göstərdi. Seçkidə iştirak edənlər 100 faiz, hakim partiyanın
namizədinə səs verənlər 100 faiz!..
Digər
namizədin atası, anası, əmisi, qardaş-bacısı o kənddən idi və onlar özlərini
yeyib-tökdülər ki, biz axı öz namizədimizə səs vermişik!..
Nisə
dedi: məndə yüz faizdir!
Rayaonda
gələn nümayəndə qulağına pıçıldadı ki, bir az aşağı düş, məsələn doxsan beş elə.
Nisə ayağını yerə vurub elə qışqırdı ki, rayondan gələn tez qaçıb maşına mindi
və aradan çıxdı. Ekzitpol da bildirdi ki, bizdə sizin faiz altmış üçdür. Nisə
dedi məndə 100-dür!
Hətta
Bakıdan gələn nümayəndə də Nisəyə astadan “bəlkə bir az enəsən?” dedisə də, qız
dəli dana kimi ayağını yerə döydü: 100-dür vəssalam!
Həmin
ili Nisəyə “Fəxri fərman” və pul mükafatı verdilər. Sonra isə onu Bakıya – Mərkəzi
seçki komissiyasında işə dəvət etdilər.
İndi
Bakıda yaşayır. Ailə qurub. Tez-tez televizorda çıxış edir, seçki haqqında
mülahizələrini insanlarla bölüşür. Hətt “100 faiz” adlı kitab yazaraq seçki
texnoloqu kimi gənc seçicilərə öz arzu və düşüncələrini çatdırıb. Kitab
bestseller kimi tezliklə satılmış və yenidən nəşr olunmuşdur. Bəzi ağzıgöyçəklər
də deyir ki, biz oxuyan xalq deyilik...
Gəla!
İki dəfə çap olunan kitabın hamısı satılıb. 100 faiz!
28.02.2020
Yorumlar
Yorum Gönder