AZAD QARADƏRƏLİ Təzə pul
AZAD QARADƏRƏLİ
Təzə pul
(“Dünyanın ən böyük adamı” silsiləsindən)
Beş
yaşım olardı. Hərfləri və rəqəmləri tanısam da, hələ məktəbə getmirdim.
Uşaqlarla
aralıqda futbol oynayırdıq. Bu vaxt bir dəstə gənc də ora gəldi və əllərindəki şaqq-şaqq şaqqıldayan təptəzə pulları
bir-birilərinə göstərdilər. Biri bir az oturub bizə baxan yaşlı kişiyə dedi:
-Bax,
əmi, bu gün maaşımızı təzə pulla verdilər!..
Hamı
meydana yığışıb yeni pula tamaşa etməyə başladı. Mən dabanlarımı ha qaldırsam
da, təkcə üstündə 1 rəqəmi yazılan pulu gördüm. Qalanlarını isə görə bilmədim. Deyilənlərdən
eşitdim ki, üçlük yaşıl, beşlik göy rəngdəymiş. Lap sonralar öyrəndim ki, onluq
da qırmızı imiş.
Axşam
ağlamsına-ağlamsına dedim:
-Dəmiryolçular
təzə pul gətirmişdilər... O qədər adam yığışmışdı başlarına, dabanlarımı
qaldırsam da, görə bilmədim... Mən də təzə pul görmək istiyirəm...
Anam
kolxozda işləyirdi və sonradan biləcəm ki, kolxozçulara pul əvəzinə əmək gününə
taxıl, noxud, kolxozda yetişdirilən başqa ərzaq məhsulları verirmişlər. Bizdə
pul yalnız dana, qoyun-keçi satanda olurmuş. Bir də pul nənəm İzafədə olardı. Meyvə-tərəvəz
vaxtı bağ-bağatımızın məhsullarını aparıb Mincivan bazarında satar, cibi dolu
pulla evimizə qayıdardı. Tərslikdən hələ qış idi və nənəmin bazara getməsi üçün
may, iyin aylarını gözləməliydik...
Babam
həmişəki kimi bir rəvayət söylədi.
Deyir,
pulkəsən gümüşü qoyur zindanın üstünə, çəkiclə döyüb qəpik halına salır. Bu
vaxt odda bişmiş gümüş pul dəmirçinin zindanından tullanıb bir qırağa düşür və
deyir:
-Ya
Allah!
Bu,
Allahın xoşuna gəlir və buyurur: sən ki, odun içində, çəkicin altda məni yadına
saldın, mən də səni elə qiymətli eliyəciyəm, hamı dalınca düşsün... Elə o
vaxtdan, pul elə qiymətə minir, hamı onun peşindədi... Bala, sənin pul istəməyin də elə-belə dəyil. Bu da Allahın
işidir... O ki qaldı təzə pula, böyünnəri Bartaz dənçiləri dəni üyüdəndə şahad
yerinə maa təzə pul veriblər... Ode ha, kürkümün cibindədi... Get, götür...
Mən
babamın divardakı mıxdan asılı kürkünü dartışdırıb endirdim və cibindən bir
ovuc qəpik, iki dənə də üstündə 1 yazılmış kağız pul tapdım. (Sizə deməyi
unutmuşam: axı babam təzəlikcə kəndimizin ayağındakı dəyirmanı işlədir. Dənçilər
bəzən şahad əvəzinə dən, un, toyuq-cücə gətirsələr də, hərdən pul da verən olur.)
...İnstitutda
siyasi iqtisad fənnindən semestr imtahanı. Sualımın biri “SSRİ-də pul
islahatları”dır. 1923-cü ildən girirəm mövzuya, pul siyasətindən danışıram, gəlib
1961-ci ilə çıxanda özümün də xəbərim olmadan gözlərim dolur. Müəllimimiz təəccüblə
mənə baxanda yuxarıdakı əhvalatı danışıram. Artıq ilk hekayələrim mətbuata ayaq
açdığından filologiya fakültəsində hamı məni gənc yazıçı kimi tanıyır və siyasi
iqtisad professoru da yəqin, bundan xəbərdardır. Ona görə zaçot kitabçama “əla”
yazandan sonra “Bu danışdıqlarını bir zaman gələr, yazarsan” deyir...
***
Bir
cöngəmiz vardı şişbunuz. Anam həmişə qorxardı ki, məni vurar. Ona görə bir
axşam həmin cöngəni satanda kefsizləsəm də, sonunda sevindim. Anam ətçidən
aldığı bir qom təzə pulu artıq birinci sinifdə oxuyan oğlunun cibinə qoyub
deyir:
-Qoy
həmişə cibin pulla dolu olsun!..
Sonra
gözləri yaşarır.
O
vaxtdan cibimdən heç zaman pul əskik olmadı. Yox, pullu-varlı birisi olmadım,
sadəcə özümə, ailəmə yetincəyə qədər pulum oldu. Bu günəcən heç kimə bir manat
nə təzə pulla, nə köhnə pulla borcum yoxdur.
Yorumlar
Yorum Gönder