AZAD QARADƏRƏLİ "ƏLLİDƏN BİR KƏM" (romandan parça)
AZAD QARADƏRƏLİ
"ƏLLİDƏN BİR KƏM"
(romandan parça)
İMİRİN ROMANI
Qeyd Dəftərindəki
yazının davamı:
“Artıq
institutda işləyirəm. Ən çox oturub-durduğum adam Raildir. Sağ olsun, Məsud
Əlioğluya məni o tuşlatdı. İkinci görüşümüz zamanı bu böyük zəka sahibi gözlərimi
tamam açdı. Həm şeirlərimi, həm məqaləmi oxuyub maraqlı mülahizələr söylədi.
Əsl tənqidi fikri mən onda gördüm. İsmayıl Şıxlını indi başa düşdüm: o mənə
qıymamış, fikirlərini ehtiyatla demişdi ki, ürkməyim. Amma Məsud müəllim mənə
daha kəskin fikirlər söylədi. Əsl poeziyanın bəşəri dəyərlərə söykəndiyini, həm
də bədii söz vasitəsilə yarandığını dedi. Sonra o gedib qapını qıfılla bağladı.
Pəncərə tərəfə boylanıb dedi:
-Məni
sevindirdin. Düzü, belə gözləmirdim. Çox irəli getmisən. Amma gərək biləsən: ədəbi
yaradıcılıq da, elmi ədəbiyyatşünaslıq da yalnız həqiqət suyu ilə yoğrulanda
pak, təmiz və müqəddəs olur. Bizdə “çimmək” kimi bir bəsit söz var, amma o
sözün bu qarşılıqlarına bir bax hələ:
“suya salmaq”, “suya tutmaq”, “pak eləmək”, “qüsl vermək”... Əvvəlki iki söz
birləşməsi öz dilimizin sözüdür, sonrakı iki söz birləşməsi isə ərəbdən gəlmədir.
Dördünün də mənası birdir: TƏMİZLƏNMƏK! Yəni Aristoteldəki katarzis... Ədəbiyyat
katarzisdən doğur.
Sonra
mənə diqqətlə baxıb bir qədər qayğılı, bir az da yorğun halda dedi:
-Amma
bunu da gərək nəzərə alasan: təmiz, pak şeylərə bizdə bir biganəlik var...
Ehhhhh... Təkcə biganəlik olsaydı, nə vardı ki?..
O,
əzab çəkirmiş kimi qırcıxdı, sanki məni bir anlığa unutdu, üzünü pəncərə tərəfə
tutub harasa zillədi baxışlarını və qayibanə bir səslə dedi:
Rəqsi təlim
ediyor axsaqlar,
Əzəmət
düşkünüdür alçaqlar.
Zövqə biganə
səfillər bol-bol
Şerü sənətdə
arar bir yeni yol.
Sadədil, hissə uyan
apdallar,
Həp siyasi kəsilib at
nallar.
Bir yığın kor qılavuzluq
yaparaq
Göstərir zülməti aydın,
parlaq.
Hər gülər üzdə ölüm, qan görürəm,
Pək yaxın dostları düşman
görürəm.
Yurdu sarmış qabalıq,
yaltaqlıq,
Yüksəliş varsa, səbəb
alçaqlıq...
Sonra qəfil mən tərəfə döndü, elə bil məni indi görürmüş
kimi qeyri ixtiyari təkrarladı:
-Yüksəliş varsa, səbəb alçaqlıq… - deyib ayağa
qalxdı. Mən indi onun necə şahqamətli, qollu-budaqlı bir adam olduğunu gördüm və düzü bu nəhəng
adamdan qorxan kimi oldum. O isə başımı tumarlayıb çox zərif bir səslə:
-Şeirlərini “Ulduz”a verəcəyəm. Çalışacağam hamısı
getsin. Elmi yaradıcılığını da davam etdir. Sənin elmi rəhbərin özüm olacam… -deyib,
sənayıcı nəzərlə üzümə baxdı. - Yaxş, bəs “Nargin adası”nın vəziyyəti nə
yerdədir? Mən o əsəri böyük həyəcanla gözləyirəm ha!
Diksindim. Bu kişidə telepatiyamı var? Axı o yarımçıq
roman haqqında çox az adamın məlumatı var. Dostum Tofiq Qəhrəmanov… Hə, bir də
Rail… Həəə, Rail deyib Məsud müəllimə…
-Bilirsiniz, bir az…
Nəvazişlə gülümsündü, sonra qalın qaşlarını çatdı və şəhadət barmağını mənə tuşlayıb sanki hədələdi:
-Bu yol qorxuludur, bilirəm. Oxuduğun məlumat və
faktların zəhmi səni basır, içini gəmirir, onlar kimi gedər-gəlməzə göndərilmək
qorxusu səni rahat buraxmır… Tanış mənzərədir… Amma bir Cavidin dönməzliyi bu
millətin simasını qoruyub! O topraklar altda yatan günahsız insanların
naləsinnən bir zaman olacaq ki, həqiqət simfoniyası yaradılacaq! Bəlkə mən o
günü görmədim. Fəqət sən görəcəksən, eşidəcəksən onu! Hökmən görəcəksən… Sənin gözlərinin dərinliyində bir qorxu
haləsi görürəm, onnan xilas olsan, elm və haqq yoluna vara biləcəksən… Unutma,
axırı elə axırda düşünərlər… Axırı fikirləşən, həqiqət yoluna qail ola bilməz…
Qapıdan çıxhaçıxda dedi:
-Hə, bir şey qaldı: o adanın adı Nargin deyil, Böyük
Zirədir. Bizim “Böyük” sözümüzlə ərəblərin “cəzirə”, yəni ada, sözlərindən
yaranıb. Nargini isə ruslar vermişdi adaya. Fin körfəzindəki Nargin adasına
bənzədiyi üçün - estonca nargin daracıq boğaz
deməkdir - buna da 1-ci Pyotrun göstərişi ilə 1719-cu ildə o adı
veriblər… Romanda tarixi məlumatı gərək dolğun verəsən…
Sabirin heykəlinin yanından ötəndə başım gicəllənirdi.
Məsud müəllimdən aldığım təsirin ağırlığı və onun ötürdüyü enerji mənə güc eləyirdi. Hiss elədim ki,
təzyiqim aşağı düşür. Gözlərim də pər-pər çalır. Yenə hər yanı ağappaq işığa
tutdular. İlahi, adam işığın bolluğundan da kor ola bilərmiş!..
Gözüm artıq görmürdü deyən, korlar
kimi əlimlə qabağı yoxlaya-yoxlaya elə bu bağdakı çayxanada boş stul tapıb çökdüm və bir müddət bükülü vəziyyətdə
qaldım.
-Haindi canu yiyim, çaymı içəssən? – Şəkililərin
çayxanasıydı bura və çayçının gənc köməkçisi başımın üstünü kəsdirmişdi.
-Bir stəkan şirin çay ver, - dedim. - Yanında da iki
pirojna olsun.
-Bu cözdərim üstə! – deyib getdi.
Qorxa-qorxa gözlərimi açdım. Şükür Allaha! Görürdüm. Bu
dəfə tez keçdi…
Cibimdəki “Qeyd Dəftəri”mi çıxardıb “Nargin adası”
romanımdan sonuncu fəsli təkrar oxumağa başladım. (Bu “Qeyd Dəftəri”mi həmişə döş
cibimdə saxlayıram. Adətimdir,
son yazdığım yazıların qaralaması ilk dəfə burda olur. Romanın da ən son
fəslini bura yazıb, sonra ağlamaya köçürdürəm. Yəni, burdakı qeydlərimi bəzən dərsdə, bəzən küçədə gedərkən, bəzən də
evdə uzanıb düşünəndə aparıram)
“…Qu desən qulaq tutular. Elə sakitlikdir ki, adamın
sümükləri sızıldayır qorxudan. Hələ Stepan Razin dövründən bu ada ölüm adası
sayılıb. Qəddar kazak Stenka çarın
acığını Bakı sakinlərindən çıxmışdı. İndiki Razin qəsəbəsində (taleyin ironiyasına bax!) ələ keçirdiyi
qənimətləri və əsirləri bu adaya gətirmiş, iri bədənli, güclü əsirləri işlətmək
üçün, qəşəng qadınları dəstəsindəki
kazakların cinsi ehtiyacını söndürmək üçün diri saxlamış, qalanlarını adanın
ilan mələyən səhrasında qılıncdan
keçirmişdi…
Bunları düşünən Aslan,
dostu Vadimlə hər dəfə bura gələndə qeyri-ixtiyari adanın qaramatı basırdı onu. Dənizin uğultusu, müxtəlif
quşların, qağayıların ahəngdar səsini pozan qa-qu çığırtıları, su itlərinin arabir eşidilən
xosunlaşması adamı bezdirir, qulağına dolmuş küydən hövülləndirirdi.
İndi tərsinə olmuşdu. Dənizə sanki ölüm havası çökmüşdü.
Anası demişkən, qulağı batmışdı dənizin. Arabir
astaca sahilə çırpılan dalğa səsi olmasa, deyərdin burda həyat yoxdur.
Vadim tilovu dənizə atıb sakitcə gözləyirdi. Bayaqdan
xeyli balıq tutsalar da, bu rus
balasının gözü doymur, balıq tutmaq üçün
əldən-ayaqdan gedirdi. Atası köhnə “kekebeşnik”
olduğundan , burda olub-bitənlərdən xəbərdar idi. Bizim dildə əla
danışırdı. Di gəl ki, yerli camaat, elə içi Aslan qarışıq ona bu imkanı
vermirdi. Bude, yenə rusca soruşur:
-Çyo Vadim, şto dumuyuş?
-Aslan, ponimayeş, buralar ölüm düşərgəsi olub, elə bil
dəniz bu gün o ölülərə matəm saxlayır… Znayeş, stolko lyudey ubili zdes?”
-Znayu…
-Papa deyirdi ki, 1915-də on min Osmanlı saldatını bura
əsir gətiriblər. Ora bax, mayakdan aşağı, bax o binalar turma imiş…
-Bakıdan bura neçə kilometrdir, Vadim?
-Pomoyemu, desit… Ponimayeş, zdes vada net e… O plenlərin
çoxu burda susuzdan ölüblər… Həm də təkcə soldatlar deyilmişlər e, Aslan,
içlərində qrajdanskilər də vardı, daje çeliy semya… Qadınlar, uşaxlar… Trabzonnan,
Erzrumdan, Karsdan, Ardaxandan qatıb plen soldatlara gətiriblər bura…
Bu vaxt bir ilan daşların arası ilə keçib gedir. Vadim
onu görüb gülümsünür:
-İlanlar da çalıb plenləri… Burda znayeş skolko zmey bıl?
Aslanı fikir
aparıb. Dənizə baxa-baxa nə barədəsə düşünür. “Yadıma arxivdə rast gəldiyim bir
qəribə məlumat düşür. “Kaspi” qəzetinin 1915-ci il saylarından birində idi.
Sona Hacıyeva adlı bir bakılı zadəgan xanım öz şəxsi paraxodu ilə Nargin adasına üzmüşdü. Yüklədiyi ərzağı
və pal-paltarı, çəlləklərlə dolu suyu nökərləri vasitəsi ilə buradakı
həbsxanaya aparmış, türk əsirlərinin bir çoxunun buradan qaçmasında yardımçı
olmuşdu. Orda yazılırdı ki, əsgərlər boş su çəlləklərində gizləniblərmiş.. Akop
adlı bir erməni bunu bilib, danos yazmış, Sona xanıma cinayət işi açılmışdı.
Məhkəmədə Sona xanım demişdi ki, mən allahın mənə verdiyi imkanımdan istifadə
edərək əsirlərə yardım etmişəm…
Sonra əlini Qurana basıb demişdi:
-Bu Quran haqqı gedəndə ərzaq və paltarla bərabər, 100
çəllək aparmışam, qayıdanda da 100 çəlləklə qayıtmışam ordan!
Qadının bu andına məhkəmə inanmış, onu buraxmışdılar.
Sona xanım həmin gün çəlləklərdə gizlədiyi 100 türk
əsgərini xilas etmiş, sonra gəmi ilə
Ənzəli limanından İrana ötürmüşdü…”
…Gəmi adaya yaxınlaşdıqca gənc oğlan həyəcanlanırdı. Gəminin yük yerinə doldurulmuş dostlarını
məyusluqla süzdü. Döyülməkdən şişib qançır bağlamış üzlərdə, qan sızmış
gözlərdə insan əzabının acı mənzərəsi dil olub dillənirdi.
Onlar doqquz nəfər idilər və
doqquzuna da KQB-nin zirzəmisində günlərlə
işgəncə vermiş, ac-susuz saxlayaraq
boyunlarına qoymaq istəmişlər ki, onlar əksinqilabi, anti-sovet dəstənin
üzvləridirlər. Guya Hüseyn Cavidin başçılığı ilə ölkədə
anti-rus və anti-sovet əhvali-ruhiyyəsi yaratmaq üçün Türkiyəni, Turanı
təbliğ edən məqalələr yazır, şeirlər çap etdirir, çıxışlar edirmişlər. (Ağır işgəncələrə dözməyən gənclər
sövq-təbii onların istədikləri ilə razılaşmış, böhtan dolu kağızlara imza
atmışdılar. Və həmin imzalardan sonra onları bu gəmiyə doldurub Narginə
gətirirdilər.) Buna misal olaraq Müşfiqin məşhur “Tozanaq” şeirini misal
gətirir, şeirdə təsvir olunan tozlu yolların, keçilməz küçələrin təsvirinin
məhz buna xidmət etdiyini deyirdilər.
Bu ada məhz onun yazdığı “Tozanaq” şeirindəki məkanın
eyniydi – bir cəhənnəm misalı. Onu sanki yazdığı cəhənnəmə gətirmişdilər
dostları ilə.
Gəminin pəncərəsindən adadakı böyük mayakı görən
dustaqlardan biri içlərində daha məlumatlı olan şairə üz tutdu:
-Mikayıl, bizi hara gətiriblər?
Sinəsindəki bez parçada 1109 yazılan şair hüznlə adanı
seyr edib qəmli-qəmli dedi:
-Cavid Əfəndi danışırdı ki, 1915-ci ildə ruslar əsir götürdükləri
on min türkü bu adada saxlayıblar. Onların çoxu burda susuzdan
ölmüşdülər… İndi alçaqlar yəqin bizə
susuzluq işgəncəsi vermək istəyirlər…
Onlar doqquz nəfər idilər –
yanlarında da doqquz ağ mişar daşı…”
Romanın həmin fəsli burda
qırılırdı. Əvvəli iki dəftərdə olan romanın yalnız bu hissəsini öz “Qeyd
Dəftəri”nə yazmış, sonra o biri dəftərə köçürmək istəmişdi. Fəqət, nə ardını
yaza bilmiş, nə də köçürə bilmişdi… O iki dəftər isə İmirin ölümündən sonra
yoxa çıxmışdı. Söz gəzirdi ki, Zakir müəllimlə Hafizə İmirin başqa əlyazmaları
ilə birgə, o iki dəftəri də yandırmışdılar.
İmirin Qeyd Dəftərindən başqa səhifə:
“Artıq Məsud Əlioğlu yoxdur. Nəinki şeirlərimi çap etdirə
bilməmişdi, hətta onun özünü o məşum intihar hadisəsindən bir az qabaq “Azərbaycan”
jurnalının redaksiya heyətindən azad etmişdilər. Amma şeirlərim, hələ yazıb
bitirmədiyim roman haqqında yazıçılar, tənqidçilər, hətta tələbələrim belə
məndən soruşurlar. Bu, əvvəllər xoşuma gəlsə də, sonra qorxmağa başladım.
Xüsusən, Əli Vəliyev kimi bir adamın oğlunun intiharı… qorxmağım haqq idi. Elə bir az keçdi, qorxduğum
başıma gəldi.
Məni KQB-nin sahil metrosu tərəfdəki əsas binasına
çağırmışdılar. Qorxudan sarımı udmuşdum. Railin yanına getdim ki, dərdimi
deyəm. Yəni məni ora niyə çağırdıqlarını, sual versələr nə cavab verəcəyimi soruşum. Elə təzəcə söhbətə
başlayıb dərdimi demək istəyirdim ki, Railin rəngi sapsarı saraldı,
kipriklərini tez-tez çaldı və ayağa qalxıb tamam ayrı bir adam səsi ilə dedi:
-Bilirsən, İmir, mən yetim oğlanam, yiyəsizəm,
arxasız-köməksizəm, qatma məni bu oyunnara… Məsud Əlioğlunu-zadı da mən heç
tanımıram düzün axtarsan… Elə sənin özünü də… Mənim adımı ağzına alma…
Əlim üzümdə qaldı.
Getdim instituta
ki, dərdimi İsmayıl müəllimə deyəm, dedilər yaradıcılıq məzuniyyəti götürüb Yaltayamı, ya
harasa gedib, işə gəlmir.
Yenə sağ olsun Abasquliyevi. Diqqətlə məni dinlədi.
Başını buladı, yumruğunu stula çırpdı: “Ax, vot tak!” Sonra əlini telefona atdı
və “buna gücü çatsa, ancaq Mirzə İbrahimovun gücü çatacaq” deyib nömrəni yığdı,
dəstəyi qaldırdı:
-Tavariş general! Zdrastvuyte! Sizi Abasquliyev narahat
edir… Yox əşşi, mən hələ polkovnikəm… Ha-ha-ha! Allah sizi üstümüzdən əskik
eləməsin… Bir İmir var bizdə, yaxşı qələmi var… Hə, hə o həmin dediyim oğlan…
Bizimkilər ilişiblər ona… Hə, çox xahiş eliyirəm, Mirzə müəllim!.. Sağ olun.
Hökmən sizə baş çəkəcəyəm. Var olun.
Sonra əlini kürəyimə çaldı:
-Vso, şef
tapşıracaq… qorxub-eləmə! Sən onsuz da bizim adamsan… Nə desələr, razı ol… Nu, sən daha bu kölgəli işlərdən əl çək!
Orda mənə nə etdilər, nə etmədilər,
nə tapşırdılar, nə tapşırmadılar, bura yazmayacağam. Yəni yaza bilmərəm sadəcə.
Amma biləsiniz ki, məni dindirən adamın stolunun üstündə boş bir şampan
butulkası vardı… Yanında da “Ulduz” jurnalının çapa getməyən bir üzlü “ottisk”
variant… Gözucu baxanda o bir üzü ağ səhifələrdə mənim bədbəxt misralarımın
sahibi kimi büzüşdüyünü gördüm… Bir daha
qəzet-jurnal üzü görməyəcək o misraları ağlamaq üçün bir ağıçıya, bir
mərsiyəxana əşddü ehtiyacım vardı…”
Yorumlar
Yorum Gönder