AZAD QARADƏRƏLİ XOCALIDAN BAŞLAYAN FACİƏMİZ “Müharibə uşaqları” kitabından seçmə hekayələr
AZAD
QARADƏRƏLİ
XOCALIDAN BAŞLAYAN FACİƏMİZ
“Müharibə
uşaqları” kitabından seçmə hekayələr
İT QUCAĞI
“Xocalını
ələ keçirdiyimiz zaman bir evə girdik. Xaçatur adında bir əsgərimiz 13 yaşlı
bir türk uşağını pəncərəyə mismarladı. Türk
uşağı çox səs-küy salırdı. Xaçatura dedim ki, onun səsini kəs. Xaçatur isə
anasının döşünü kəsib balasının ağzına tıxadı. Mən ixtisasca həkim olduğum üçün
üstümdə olan tibb bıçağı ilə uşağın başının, sinəsinin, qarnının dərisini
soydum. Saata baxdım. 13 yaşlı uşaq 7 dəqiqədən sonra öldü. Ruhum sevinclə qürrələndi.
Xaçaturla mən uşağın meyitini hissə-hissə doğradıq, tikələri itlərə atdıq və
eyni şeyi daha üç türk uşağına qarşı etdik.Mən bir erməni kimi öz vəzifəmi
yerinə yetirdim. Bildim ki, hər bir erməni bizim etdiklərimizlə fəxr edəcək”.
Zori Balayan “Ruhumuzun canlanması”
kitabından
Kişiləri
divara söykəyib bircə anda güllələdilər. Güllələr dəyəndə adamlar səs
çıxartmağa macal tapmamış qeyri-müəyyən səmtə yıxılır, dodaqlarını
aralayıb nəsə demək istəsələr də, söz əvəzinə qan tökülürdü ağızlarından.
Mən
yaşda iki qızı diri-diri süngüyə taxdılar, sonra hərəsini bir ağaca sarıyıb
üstlərinə benzin töküb yandırdılar. Onların alovun içində qışqıra-qışqıra nə dediklərini anlamaq istəsəm
də, bu mümkün olmurdu. Məni sinəsinə
sıxmış anam gah əli ilə gözlərimi qapayırdı, gah barmaqlarını qulaqlarıma
tıxayırdı.
Bu
vaxt bir maşın gəldi. İçindən düşənlər bizimkiləri öldürənlərə nəsə dedilər.
Hiss olunurdu ki, vəziyyət dəyişib. Bizi
qabaqlarına qatıb harasa aparmağa başladılar.
Anam əlimdən tyutmuşdu və mən on yaşlı oğlanın anasını
qoruya biləcəyi haqda bütün əfsanələri,
nağılları bilsəm də, bunların mənasızlığını anlayıb bu əldən bərk-bərk
yapışmışdım. Bu əlin istiliyi bir yana,
onda nəsə başqa bir güc də vardı: inanırdım ki, əlim bu əldən üzülməsə, mənə
ölüm yoxdur.
Amma
üzüldü. Bayaqdan gözü bizi almış erməni
zabiti (artıq əsgəri zabitdən seçə bilirdim, müharibə uşağıydım axı) mənə yaxınlaşıb saçımdan tutdu, hirslə dartıb
anamın əlindən aldı və ermənicə pis bir söyüş də söydü. (Mən bu dildə bir az
bilirdim onda)
Qadınları bir tərəfə, kişiləri başqa bir tərəfə apardılar. Mən də kişi dəstəsindəydim.
Bizi gətirib taxtadan tikilmiş fin evlərinin
bir gözünə saldılar. Axşamacan səs-soraq çıxmadı. Təkcə qadınlar salınan otaqdan arabir boğuq qadın
qışqırtısı gəlirdi. Hərdən də qapı açılıb-örtüldükcə içimizdə ən yaşlı adam
olan Cürə dayı astadan hönkürür, başını divara vururdu. (Qadınlar olan otaqda
onun qızı, gəlini və mən yaşda nəvəsi vardı. Əvvəl kişinin niyə belə elədiyini
başa düşmədim. Elə ki, pəncərədən gəlinini erməni əsgərlərinin sürüyə-sürüyə
harasa apardıqlarını görəndə məsələni anladım. İnanın, mən də başımı divara
vurmaq istədim – amma divar taxtadan idi, başın bu taxtalara çırpılmasından bir
fayda olmazdı ziyandan başqa – taqqıltıya ermənilər gəlib bizi əzişdirərdilər.)
Gəlininin
“ay namərd allah hey” nidasını eşidəndə
Cürə dayı gah başını döşəməyə çırpdı,
gah taxta divarın hamar yerinə döydü və xısın-xısın ağladı.
Birdən mənim
gözlədiyim fəlakət baş verdi. Bayaq məni anamın əlindən dartıb alan zabit anamı sürüyüb çölə çıxartdı. Qarnına, üzünə təpiklə vurmağa başladı. Mən
özümü pəncərəyə çırpıb anama yetişmək, onu bu cəlladın əlindən almaq istədim.
Yanımdakılar əllərimi tutdular, biri hətta əliylə ağzımı da yumdu.
Bu vaxt
erməni zabiti təmiz Azərbaycanca dedi:
-Ara, bu
ləçər xoşuma gəlmişdi, ama baxdım ki, qəhbə boyludu. Kazbeki açın. Bunu Kazbekə
yedirdəcəm, ali!...
(Mən
anamın ikicanlı olduğunu bilirdim. Müharibə hələ təzə-təzə qızışan vaxtlarda
atam səngərdən gələndə başını onun qarnına söykəyər, bığaltı gülüb deyərdi: “İstəyirəm qızımız olsun. Anamın
adını qoyarıq ona.”)
Bizdən əvvəl
bura salınan iki azərbaycanlı kişi qorxaq nəzərlərlə pəncərədən baxa-baxa dedilər:
-Yazıq
qadın. Bu oğraşın bir iti var ki, günlərlə ac saxlayır, sonra əsirlərin üstünə
buraxır... Diri-diri parçalayır onları...
Heç beş
dəqiqə keçməmiş it hürüşməsi eşidildi, dalınca
da anamın çığırtısı. İtin anamın üstünə necə atıldığını görsəm də
qalanına baxmağa imkan vermədilər –
bayaq başını divara çırpan Cürə dayı əlləri ilə gözlərimi yumdu. İtin
zingiltisini, anamın çığırtısını eşitdikcə bağrım sökülürdü. Arada ermənilərin
hırıltısı da bu səslərə qarışırdı.
Bir az
sonra səslər kəsildi. Cürə kişinin əlləri boşaldı və dartınıb onun əlindən
çıxdım. Adamların arasından soxulub
anamın başına gələnləri bilmək istədim və
pəncərənin şüşəsindən gördüyümdən əvvəl bir şey anlamadım. Anam yerə
uzanmışdı, hərdən gah qolu, gah qıçı tərpənirdi. Kazbek deyilən dikqulaq nəhəng it isə anamın qarnından çıxrtdığı qanı süzülən
uşağı ağzında tutub durmuşdu.
Həmişə əllərimdən bərk-bərk yapışan anamın əlləri
indi al qan içindəydi və bu quduz itin
dişlərində didik-didik olmuşdu.
-Ana!!!
Necə
bağırdımsa pəncərə önünə yığılmış bizimkilər bircə anda geri çəkildilər və mən
tək qaldım. Elə bil mənə hardansa güc gəldi. Üzümü zabitə tutub mənə yad olan bir səslə necə bağırdığımı özüm
də bilmədim:
-Oğraş!
Sən alçaqsan! Alçaqsan!!!
Elə bil
ki, kəndimizin dağları bu səsləri bir-birinə ötürdü: “Alçaqsan... san... san...
san.. alçaqsaaannnn...”
Zabit pəncərəyə
doğru gəldi. Təpiyiylə vurub taxta pəncərənin şüşələrini sındırdı, sonra çərçivələri təpikləyib
qopartdı. Əl atıb saçımdan yapışdı, anamın əlindən aldığı kimi
məni dartıb şüşə qırıqlarının içindən
çölə çıxartdı, təpikləyə-təpikləyə gətirib
Kazbekin qabağına tulladı. Kazbekə elə bil nəsə olmuşdu. Bayaqdan ağzında
tutduğu bapbalaca uşaq meyidini yerə saldı. Qabağında əsim-əsim əsən on yaşlı
oğlanı – məni maraqla süzdü, uzun dilini
çıxardıb üzüm aşağı axan qanı yaladı. Qorxudan
elə qurumuşdum ki, nə səsim çıxırdı, nə də tərpənə bilirdim. Bir az
sonra it məni qolları arasına alıb
anamın hələ də tərpənən, kəsik-kəsik səslər çıxardan cəsədinin yanında yerə
sinidi və gözlərini yumdu.
Ətrafa
bir səssizlik çökdü. Ermənilərin içindən kimsə dərindən köks ötürüb dilləndi:
-Ay
astvas...
-İtinə
şükür, xudaya!? – Bu səs isə Cürə kişinin səsiydi.
Elə bil
uzun bir zaman keçdi. Mən itin qucağında, bədəni param-parça olmuş anamın cəsədi
və ondan bir az aralıda bacım, yaxud qardaşım olan körpə bir uşağın qan içində meyidi... Sehirlənmiş
kimi ayaq üstə qalmış erməni silahlıları və pəncərədən boylanan əsirlər...
Bu
an erməni zabiti tapançasını çıxardıb məni
qucaqlamış Kazbekə tuşladı. Gözləri bərəlib
hədəqəsindən çıxırdı az qala. Qapqara saçlarını sol əlinin titrəyən
barmaqlarıyla geri itələyib iki dəfə atəş
açdı. İt başını sinəmə qoyub öldü. Mən də
gözlərimi yumdum – güllə haramısa dəlib keçmişdi. Anamdan sonra yaşamaq istəmirdim
onsuz da...
***
Kazbekə
dəyən güllənin biri qolumu qırmışdı. Cürə dayı köynəyimi cırıb yaramı sarıdı.
***
Sonra
məni və Cürə dayını dəyişdilər.
Kişi gələndən
bir həftə keçmiş öldü. Mən isə yaşadım.
Qolum sağaldı. Naftalanda məktəbə getdim. Orta məktəbi bitirəndən sonra Aviasiya Akademiyasına sənəd vermək istədim,
götürmədilər. Boyun çatmır dedilər. Amma mənim təkcə boyum yox, çox şeyim
çatmır. Məsələn, havam çatmır hərdən. Elə bil boğuluram... Bir də ürəyimin
döyüntüsü... Vurmur hərdən ürəyim. Elə-belə, qəfilcə dayanır. Deyirəm, yəqin
indicə ölləm. Amma ölmürəm... Bir az sonra öz-özünə işə düşür... Bir də... Bunu
necə deyim sizə? Bu, əslində mənim bu dünyadan o dünyaya aparacağım sirrimdir:
kişiliyim yoxdur. Nə illah eləsəm də,
illacım olmadı. Qadına, qıza baxa bilmədim... Baxdım əslində. Amma elə
baxdığım andaca həmin qadın, ya qız dönüb anam olurdu, Kazbek də onu süpürləyib
altına salırdı, sonra da qarnını yırtıb uşağı qarnından çıxardırdı... Sonra da
o it məni qolları arasına alırdı...
...Hə, bir şey qaldı. Qoy onu da deyim: bir itim var, adı da Kazbekdir.
Hərdən başımı qollarının arasına qoyub uzun zaman susuram. O da etiraz eləmir.
Başa düşür ki, hərdən adamın it qucağına da ehtiyacı olur. Əslində bu işıqlı
dünyada yeganə canlıdır ki, ona sığınmışam.
***
S.A(Söz
ardı)
Bir
vdəfə Moskvanın NTV kanalından bir
psixoloqun hazırladığı verilişə baxırdım. (Mənim özümün də psixi problemlərim
olduğu üçün belə verilişləri izləyirəm həmişə) Psixiatr qadın iki orta
yaşlı adamı danışdırırdı. Biri mənə tanış gəldi. Tez-tez gözlərini qırpan, üzü
səyriyən, əlləri əsən bu qaragöz, qarasaç adam dəqiq qafqazlıydı. Danışığını
yaxşı başa düşmək olmurdu. O biri isə nisbətən rahat danışırdı. Məlum oldu ki,
qardaşdılar. Danışa bilən izah edirdi ki, qardaşı Qarabağda döyüşüb. Zabit
imiş. Xocalı hadisələri zamanı sarsıntı
keçirib. Ordudan tərxis olunandan sonra iki dəfə intihara cəhd edib.
Gəlin
sizə and içim ki, bu Kazbeki anamın üstünə qısqırdan zabit idi. Bir az qabaqdan
saçı tökülmüşdü. Bir az da
arıqlamışdı...
Özümü
pis hiss elədim. Dilim keyidi. Həkim demişdi ki, belə verilişlərə baxmayım...
5 iyul 2014
ƏSİRLİKDƏ
Atam demişdi ki, bacıngilə çatdır özünü –
bacını da, uşağını da al tərkinə, götür gəl. Mən də atın yəhərini belinə
basmış, tapqırını çəkmiş, yüyənini, cilovunu başına keçirib Güloğlanlıya çapmışdım.
Güloğlanlıyla bizim kəndin arası heç on kilometr olmaz bəlkə. Amma kəsə yol da
var. Kəsə daha tez çatarsan. Mən də kəsəylə gedə-gedə bacımı qınayıram ürəyimdə
ki, axı atamız gecəynən maşın gətirmişdi, niyə durub gəlməmisən? İndi mənim, 15
yaşlı uşağın bu dərə-təpədə nə işi var ki, qəfil erməni pusqusuna rast gələ,
başlı-gözlü gedə cəhənnəmin dibinə?
Gör
kişiyə nə demişdi:”Dədə, (biz qarabağlılar axı ataya dədə deyərik) mən Kərimsiz
getmərəm burdan. Özü də dünən əsgər yoldaşınnan sifariş eləyib ki, nəbadə evdən
bir çöp çıxardasan, deyərlər komandir evini çıxardır için-için... Gözlə, gələcəm.”
Kərimə
də allah insaf versin. İki ildir könüllü vuruşur, ha deyirik ki, bacımı gətir,
qoy bizdə, salıb tərs yerinə. Zoğallıyır...
Amma
yoox, Kərim yaxşı oğlandı vallah! Bacımın əri olduğuna görə demirəm ki. (Biz tərəfdə
yeznəni öymək man gələr. Ayıb da olsa, yeznə eşşəyə deyirlər...) Mən ilk dəfə qəşəng
sözləri ondan eşitmişəm. Qəşəng söz deyəndə ki, bu Kərim Bakıda oxuyub gəlmişdi,
telli-toqqalı oğlandı. İndi mən ata mindiyim kimi o da, bir bozalaq yabıları
vardı, minərdi ona, sürərdi bizim kövşənə. Tellərini barmaqlarıyla
daraya-daraya oxuyardı:
Xəzərin
sinəsi parladı par-par,
Yel
əsdi, titrədi, yelləndi şamlar,
Niyə
ürkək-ürkək baxdın, ay Çiçək?
Niyə
ürəyimi yaxdın, ay Çiçək?!
Çiçək
bacımın adıydı. Mən sonralar başa düşdüm ki, o bu mahnını bacımçün oxuyarmış.
Qoy
görüm necə oxuyardı... Gərək əvvəlin
muğam üstə başlayım... Bizdə, Qarabağda hamının səsi olur ax. Bir şair
yazmışdı ki, Qarabağda uşağa təpinsən, muğamat üstə ağlar...
Belə,
dadey-dadey-dadey... Ond dörd gecəlik ay kimi rüxsarına qurban... Can
aman-aman, ölürəm, ölürəm...
Bu
nə səsdi, ə? Güllə açlıdı elə bil? Vay dədə, vay!
***
Güloğlanlıya iki kilometr qalmış məni tutdular. Özüm cəhənnəmə e, bacım
da burdadı, zılğası da qucağında. İndi bizim nəslin kişiləri içi özümqarışıq, gərək
papağımızı qoyaq götümüzün altına. Hə dana... Otuz yaşında bacımız erməni əlində
əsir-yesir oldu... Allah evin yıxsın Qurban müəllimin! Elə ağzın açırdı,
deyirdi “Dədə Qorqud”u yaxşı oxuyun, bu
bizim qəhrəmanlıq dastanımızdır... Nə təhər olur ə, qəhrəmanlıq ki, kişinin
anasın da, arvadın da əsir-yesir eləmişdilər?!
Bude, gəlir Şurik. Burda hamı ona tabedir. Oğraş ağzımın üstündən necə
vurubsa, dodaqlarım pardaxlayan qızılgül kimi açılıb. İndi yenə çırpacax bizi.
Bacım arvadlarnan o birisi donuz damındadı. Bizi – bir ortayaşlı kişidir, bir də
mənəm – salıblar bu kiçik otaqçaya. Əvvəllər tualet-zad olub deyəsən, baş
çatdadan iyi gəlir. Əşi, cəhənnəmə iyi, elə bacımı buraxsınlar, mən bu iyiyə də
dözərəm.
-Ey, şandığa*! Çıx görüm, ali!
Şurikdi,
yəqin çırpmağa aparır məni. Elə qapıdan çıxanda gözüm Valod əmini alır. Atamnan
qardaş kimiydi. Onlarda çaxır vurardılar, bizdə vodka. Sonra atamla fermaya
gedib mal-qaranın vəziyyətini yoxlayıb akt yazardılar. (Onlar Gəncədəki Kənd Təsərrüfatı
İnstitutunda bir oxumuşdular.) İndi bu da qoşulub saqqallılara. Bəlkə özümü
tanıdım? Bircə bu Şurik imkan versəydi...
Yanından keçəndə astadan “Valod əmi, Adiləm, Aslanın oğlu” deyirəm, elə
söz ağzımdan çıxan kimi Valod əmi iri, ağır əlini qaldırıb başıma bir qapaz
salır və elə bizim dildəcə deyir:
-Siz
oğraşdarı yaxşı tanımamışıx! – Sonra ermənicə bərkdən “kunim mama”* deyib Şurikə
yaxınlaşır, nəsə deyir ermənicə. Bir müddət beləcə danışırlar, hətta mübahisə
edirlər və axırda Şurik gülümsünür. Və Valod yenə mənə yaxınlaşır. Kürəyimə bir
təpik vurur, məni qabağına qatıb harasa aparır. Və yolda yenə bir-iki yüngül təpik
vura-vura lap pıçıltıyla deyir:
-------------------------------------------------------------------------------------------------------------
*Şandığa (ermənicə) – köpək oğlu
*Ermənicə ana söyüşü
-Ərə, Adil,
oğlum, man sani o sahat tanıdım. Ama bunların yanında sani vurmasaydım,
şübhalanardılar. Ara, məni oğlan sizinkilərdə əsir idi. Ama artıq bilirəm ki,
qaçmaq istəyəndə vurublar, ölüb. İndi meyti almaq istiyiram. Səni oğlumun
meytiynən dayişacam. Bax, evdə bizimkilər səni tanıyacaxlar, o heç. Ama bir
oğlum var, Zorik, ela san yaşdadı, qoşulub bu daşnaklara, məninən də yola getmir.
Özünü onnan gözlə. Səni öldürər o it oğlu...
***
Üç aydır Valodun tövləsində zəncirlənmiş
halda qalıram. Gündüzlər günüm itin günü olur. Kəndin uşaqları da qoşulur Zorikə,
gəlib məni o ki var döyürlər. Hərdən at kimi minirlər. Əlbəttə, Valod əmi evdə
olanda az döyürlər, amma olmayanda... Gecələr isə kef çəkirəm. Valod özü, hərdən
də arvadı mənə yemək gətirirlər, çay
verirlər. Valod mənimlə oturub danışır da hərdən. Yəni ki, mənimlə nə
danışasıdı? Elə öz-özünə ozalanır. Məsələn, bax belə:”Eşək oğlu dığaya dedim
ki, getmə, özünü güllə qabağına vermə. Mən neynirəm Karabaxı axı? Heç bu
Güloğlanlının yanındakı Stepankənd mənimdi guya? Ara, iyirmi metr beləsinə,
qırx da beləsinə bir oqorodum var, belə getsə, bu Erivandan gələn saqqallılar
onu da əlimdən alacax. Elə almış kimidi. Permanı da dağıdıplar, mal-qaranı yox eliyiplər, man da qalmışam
işsiz-gücsüz. Bir ildir əlimə tüpəng verib salıblar çöllərə. Bir dığa öldü.
Biri də dağda-daşda. Man neyniram Karabaxı? Hay?! Ara, Adilcan, allax qoysa,
sani dayişacaxlar. Gedassan, eviniza. Burda manim hardan məcbur qalıb sani
vurmağımı, bizim Zorikin sana zülüm elamayini Aslan kibrəyə demə... Ayıbdı,
ali. De ki, man onu çox istəyirəm...” Sonra da göz yaşlarını silə-silə əlini
başıma çəkib gedərdi.
Bir
dəfə ondan bacımı soruşdum. Dedi, ara, man sani onların alinnan güjla xilas
elemişam... Bacının adın tutma... Man da Şurikdən qorxuram. Allax bilan
maslahatdi...
Daha
susdum. Əlimdən nə gəlirdi ki? Gecələr bacımı yadıma salıb ağlayar, allaha
yalvarırdım ki, ona bir şey olmasın.
***
Bir gün Şurik Valod əmigilə gəldi. İkisi ermənicə nə danışdılar, nə
danışmadılar, məni qabaqlarına qatıb əvvəl saxlandığım donuz damına gətirdilər.
Məni yarıqaranlıq bir otağa saldılar. Gözüm qaranlığa alışanda baxıb gördüm ki,
bacım bir küncdə əyləşib, qucağında da uşağı. O biri küncdə də bir qoca arvad
böyrü üstə uzalı qalıb. Mən özümü bacımın üstünə atsam da, o qışqırıb küncə
qısıldı. Qucağında tutduğu da yerə düşdü. Baxdım ki, bu uşaq deyil. Bir əski
parçasını uşaq kimi bələyib, alıbmış qucağına. Qoca arvad məni
görcək sızıldaya-sızıldaya dedi:
-Ədə,
bala, bu bədbaxtın nəyisən?
-Qardaşıyam,
- qəhərli-qəhərli dilləndim.
Arvad
ağladı.
-Ona
zulum elədilər, bala. Uşağını əlinnən alıb yanan tonqala atdılar, özün də...
Qarının
səsini elə bil mişarla kəsdilər. Handan-hana dedi:
-Ağlı dəbəriyib, səni tanımadı...
***
Şurik məni öz otağına çağırıb yerə uzatdı. Şpirisə salyarka şəkib
(iyisindən bildim) verdi Valod əmiyə. (Bilirsiniz də, Valod əmi də atam kimi veterenardı. Nənəm
demiş, arsız canım, qoy elə gülüm: anam atama mal həkimi deyərdi, o da hirslənib
qayıdardı ki, mən mal həkimi deyiləm, veterenaram! Biz də başlayardıq gülüşməyə...)
O da şprisi ombama taxsa da, bədənimə yeritmədi. Şurik çölə çıxan kimi
salyarkanı yerə töküb şprisi bir də ombama taxdı və mən bağırdım. İki saat
sonra qıçı sınmış qoca qarını, dəli olmuş bacımı və məni iki erməni zabitinə və
Valod əminin oğlunun meyidinə dəyişdilər. Bacım bir ay sonra öldü. Mən isə
Valod əminin sayəsində ölmədim, axı salyarkanı o yerə tökmüşdü.
30
iyun 2014
ZARANIN
GÜNDƏLİYİ, 8 MART GÜLLƏRİ
“Tüfəngi
üzümə tutmuşam. Bu tüfəng deyil ki! Televizordu, videodu, kinodu... Səni heç
kim görmür, amma sən adamları görürsən, nə elədiklərinə baxırsan... Kefin istəsə,
tətiyi çəkirsən və öldürürsən...
Bir
dəfə oturmuşam yerimdə, müşahidə aparıram. Qabağımda şəkil var. Yaraşıqlı bir
oğlandır. O dərəcədə yaraşıqlı ki, az qala vurulacaqdım. Yelena Parisə* vurulan
kimi... Düşmən olanda nə olar, əclaf çox yaraşıqlıdı. (Elə də düşmən deyirəm
ki, guya bu azərbaycanlılar atamı oldürüblər, anamı əsir aparıblar...
Uşağımı... Allah sən saxla, bu hardan ağlıma gəldi?! Bircə balamı allah
qorusun...)
Hə,
şəklidəki oğlanı axtara-axtara qarşıdakı binanın adamlarını bir-bir gözdən
keçirirəm. Bir də gördüm bude, oğlan gəldi. Amma bu şəkildəkinin eyni olsa da,
məncə yaşca çox kiçikdir. Şəkildəkinin 20-22 yaşı olar, bununki isə bəlkə 16-17
arasıdır. Nə bilim axı, mən də bu işin mütəxəssisiyəm də. Livanda bizə altı ay
snayperlik kursu keçiblər. Bu işin cikinə-bikinə də bələdəm. Bir də tüfəngin
binoklu əla göstərir axı. Nəysə, oğlan gəldi çıxdı binanın 3-cü mərtəbəsindəki
mənzilə. Pəncərənin qabağında özü yaşda
bir qızla başladılar öpüşməyə. Hirsimdən boğuluram. Gözüm tutub axı oğlanı. Az
qalıram ki, qızı vuram. Amma olmaz. Mən hər tapşırığa görə 1000 dollar alıram.
Oğlumun Beyrutdakı lisey haqqını ödəməliyəm, musiqi müəlliminə üç aylıq dərs
haqqı göndərməliyəm. Uşağın digər xərcləri
də var. Dala da atmalıyam. Buradan azı 60 minlə qayıdam gərək. Hələ ki, işlər
pis getmir. Onların 15 lazımlı adamını o dünyaya göndərmişəm. Tək bircə dəfə səhvim
olub. Hərbçi mayorun əvəzinə həkim mayoru vurmuşdum. Pulumu kəsdisələr də, işdən
kənarlaşdırmadılar...
Bu
gün 8 Martdır. Ciddi tapşırıq var. Bunların bayramını yasa çevirməliyəm. Bir müəllimə,
yaxıd qadın həkimlərini vurmalıyam. Səhərdən müşahidə aparıram, hələ bir şey
yoxdur. Bax, o qırmızı kirəmitli ev kəndin həkiminin evidir. Arvadı da həkimdir.
Yolun altındakı isə məktəb direktorunun evidir, bunun da arvadı müəllimədir...
İkisindən birinin arvadını vurmalıyam. Səkkiz Martlarını qana boyamalıyam.
Tapşırıq belədir...
Çənəmi
tüfəngin altına dayamaqdan çənəm bumbuz olub bu soyuq mart günündə. Hər iki evi
iki saatdır müşahidə edirəm, hələ görünən olmayıb. Mən isə əmri ən geci saat 3-ə
qədər yerinə yetirməliyəm. Belə getsə... Aha, müəllimin evi tərəfdən bir uşaq
çıxdı. Olar 8-9 yaşlarında. Dayan, dayan, bəlkə elə bu direktorun uşağıdır. Ay
nə olardı! Bizim bu axmaqlar
başa düşmürlər ki, uşaq daha vacibdir. Amma
siyahıda həkimlə müəllimdir. Ağdam camaatı da dəlidi vallah
. Görürsünüz ki, gündə bir adamınızı snayperlə dənləyirik,
çıxın gedin də buralardan... Dayan. Bu uşaq hara gedir? Əyilib nəsə yığır? Nə?
Gül yığır?.. Ay səni!
Kopayoğlunun küçüyü! Yadıma Hamletimi saldı. Mənim
Hamletim də həmişə 8 Martda mənə gül gətirərdi.
Bu küçük də... Niyə küçük deyirəm axı ona? Onunla mənim nə ədavətim var? Mən
sadəcə bir peşəkaram. İki aylıq müqavilə ilə bura gəlmişəm, ailəmin
dolanışığını təmin edib gedəcəyəm. Mən heç erməni də deyiləm axı. Livanlıyam,
yunanla ərəbin qarışığından olan livanlı. Mənim bu iki millətin davasına heç
bir aidiyyatım yoxdur... Ezamiyyətə gəlmişəm. On günüm qalıb. İşimi görüb,
pulumu alıb çıxıb gedəcəyəm. Bu uşağa isə dəyməyəcəyəm. Nə işim var onunla. Elə
bil Hamletlə əkiztayıdırlar... Həm də yaşıd olarlar. Həm də ikisi də
ağappaqdırlar...
Hə,
gül yığır. Bu soyuqda nə gülü yığır bu uşaq? Yəqin... görüm bunlar necə
adlandırırlar o gülü? Hə, bənövşə... Buralar aran kimidir də. Elə aran Qarabağ
deyirlər... Ona görə istidə güllər tez açır...
--------------------------------------------------------------------------------------------------------------
*Yelena və Paris – Yunan mifologiyasının qəhrəmanları.
Onların məhəbbəti məşhur Troya müharibəsinə səbəb olub
Bir qom düzəltdi. Yəqin gedər daha.
Bunu gərək gözdən qaçırmayım. Əgər evə gedəcəksə, demək anası evdədir... Heyf
ki, həkim məntəqəsini görmək mümkün
deyil. Yoxsa işi tez bitirərdim. Dərs də yoxdur bu gün. Bu evdən əl çəkə bilmərəm.
Görək bu uşaq hara gedib çıxacaq?
Hə,
həyət qapısından girdi içəri. Qapıda südü sağılmamış inək var, yelinlərini də
görürəm. Demək qadın çıxacaq inəyi sağmağa... Ahaaa... Çıxdı arvad. Yaxşı.
Bunun üzü niyə belə görünür? Bəlkə heç o qadın deyil? Niyə şal örtüb başına? Bu
nə təhər xalqdır? Gah şal örtür, gah örtmür? Hə, həyətin o başında yaşlı kişi
var. Dəqiq bu qadındır. Kişi də qaynatasıdır. Levon deyir ki, bunlarda cavan gəlinlər
qaynata yanında başlarını örtər, səslərini qaldırmazlar... Dayan, uşaq qadına tərəf
getdi. Dəqiqi müəllimə budur! Gülü ona uzadır. Nişan alırıq, tətik!
Oyyyy!
Mən nə etdim. Allahım?! Güllə uşağa dəydi! Yerdə çapalayır. Qadın isə sağdır!
Uşağı da çəkib girdi daldaya... Mən nə etdim? Niyə belə oldu?! Mənim günahım nədir,
allahım?..
Dayan,
o nədi elə ağarır? Qadının başıdır bəlkə? Yoox... Gözüm elə bil tor görür.
Noldu mənə? Nəysə. Cəhənnəmə ki. Tətik, nişan, atəş!.. Oy! Mənə nə olub? İnəyin
yeliniymiş ağaran?! Qan qarışmış süd dağıldı həyətə, inək böyürür... Uşaq qanı,
inək qanı, süd... Mən dünyanın ən böyük günahını işlədim...
Oğlum,
Hamlet... Mən günah işlədim... Mən... Mən...”
***
Səhəri
gün bütün dünya qəzetləri yazdı ki, Ağdamda bir məktəblini snayperlə vurublar.
***
Rusiyanın “Kommersant” qəzeti isə
yazmışdı ki, Livandan gəlmiş Zara
adlı ( adı bəlkə də Zəhra imiş, ruslar
Zara yazıblar) snayper qadın səhvən ağdamlı uşağı vurduğuna görə havalanıb.
Özündən rütbəcə böyük olan Levon adlı erməni zabitinin onun üstünə qışqıraraq təhqir
etməsindən sonra əsəblərinə hakim ola bilməyən snayper erməni zabitini güllələyib. Zabitin yoldaşları havalanmış
qadını gülləyə tutaraq dəlik-deşik ediblər. Qadının cibindən üstündə “Hamlet”
yazılmış bir uşaq şəkli çıxıb. Bir də
yuxarıda verdiyimiz qeydlərin də yer aldığı gündəliyin ərəbcədən ruscaya tərcümə edilərək qəzetdə çap
olunmuş variantı. Mən də onu dilimizə
uyğunlaşdırdım. Amma bir şeyi başa düşmədim: qəzet ağdamlı uşağın şəklinin əvəzinə
Zaranın oğlu Hamletin şəklini çap etmişdi? Niyə?
15 iyun 2014
BİZƏ İKİ
QƏBİR QAZIN...
Füzuli
rayonunun Alxanlı kəndində erməni
gülləsinə tuş gələn balaca Zəhranın xatirəsinə
O
nə səs idi elə? Göylər bir anda qəzəbləndi. İşıqlı, odlu-alovlu dolular yağdı
başımıza. Dolu işıqmı saçar, ay ana? Nənə, ay nənə, sənə nə oldu? Bəs həmişə mənə
qorxma deyirdin, niyə qışqırırsan? Qorxma e, ay nənə, qorxma. Göy guruldayır.
Allah baba qəzəblənib, başımıza dolu tökür... Amma bilmirəm ki, bu dolular niyə
işıq saçır?
Mən niyə dura bilmirəm? Üzüm aşağı axan nədir? Qandır? Bəs niyə istidir?
Yandırır e üzümü... Bəlkə şəkil çəkəndə rəng bulaşıb üzümə? Hə? Niyə bəs
yandırır?
Ana, ay ana. Niyə qışqırırsan? Ata, sizə nə olub? Deyəsən axı mən ölmüşəm?
Nənəm də ölüb? Ölmək belə olur? Hamı ayaq üstə, təkcə sən yerə uzanmısan. Özü də
ha qışqırsan da, səni eşitmirlər. Eeee... Bu nədi e üstümə örtüblər? Nəfəs ala
bilmirəm axı, götürün bunu...
Nənə, ay nənə! Barı sən məni eşit! Biz ölmüşük? Ermənilər öldürdü bizi?
Əgər biz ölmüşüksə, erməninin əsgərləri bizi öldürübsə, onda niyə bu adamlar
ağlaşırlar? Niyə hücuma keçmirlər?.. Amma yox, hücuma keçsinlər, erməninin
uşaqlarını öldürməsinlər... Axı uşaq hər yerdə uşaqdır... Özü də günahsız... Mən
bir azca böyüsəydim, əlim qələm tutsaydı, bütün dünyanın uşaqlarına məktub
yazardım, bütün uşaqları birliyə çağırardım! Hamımız ölkələrimizin sərhədlərinə
yığışıb müharibəyə etiraz edərdik... Eheyyyyyy! Dünya uşaqları! Siz məni
eşidirsiniz??????
Bu
nədir? Bizi hara gətirirlər?
Hə.
Anladım. Bir dəfə eşitmişdim ki, ölüləri torpağa dəfn edirlər. Bizi də nənəmlə
burada – qəbiristanda dəfn edəcəklər yəqin? Dayan, dayan... Qəbirin biri yekə,
biri balacadır. Lap əl boyda... Yəqin o balaca yerdə məni dəfn edəcəklər. Yox,
e, yox. Olmaz axı! Birdən ağac kimi, ot kimi torpağın altında bitdim, kök
atdım, böyüdüm? Bəs onda mən bu balaca əl boyda qəbirə necə sığaram?
Olmaz, e, olmaz. Mən axı burda tək qorxaram! Nə olar, nənə, atama de,
qoy məni sənin qucağında dəfn etsin... Qorxuram o dar qəbirdə təkcə...
...Eheyyyyyyy!
Dünya uşaqları! Siz məni eşidirsiniz!? Sizi də böyüklər güllə ilə öldürəcəklər!
Ananızdan ayırıb əl boyda balaca qəbirdə basıracaqlar! Qoymayın, qışqırın!
Deyin ki, ya müharibələri dayandırın... ya da heç olmasa bizə iki qəbir qazın:
birində də arzularımızı dəfn etmək üçün...
06.07.2017
MÜHASİRƏ
Qurd
tut yarpağını necə yeyər? Bir qırağından yeyə-yeyə gəlib çıxar o biri qırağa,
oradan da başladığı yerə. Elə bil yarpağın bütün qıraq yerlərini dişi ilə dörd
tərəfdən əhatəyə alar. Bax, erməni
yaraqlıları da bizi belə mühasirəyə almışdılar. Əsgərlərimiz onlarla son güllələrinəcən
döyüşsə də, qabaqlarını saxlaya bilmədilər – sonradan bildik ki, rusların
366-cı alayı da ermənilərin köməyinə gəlibmiş.
Biz
150-cən adam idik. Yarıdan çoxumuz qadın, uşaq və qocalardı. Bir sutkaydı ki, Kətik
meşəsinin dərinliyində gizlənmişdik. Yeganə qoruyucumuz da elə bu yarıqaranlıq
meşə idi.
Fevralın şaxtası iliyimizəcən dondururdu bizi. Lap körpələri don
vurmasın deyə qoynumuza-qoltuğumuza soxurduq. Üç aylıq bir uşaq elə bu vurhavurdaca göyərib keçdi və
gözümüz görə-görə öldü. İçimizdəki yeganə silahlı kişi olan Nemət dayı cibindən
çıxardığı iri qəmə ilə yeri qazıb onu basdırdı. Gənc ana Şəfiqə ilk uşağını itirən gecə havalandı. Gedib ölən uşağın qəbrinin
yanında yatdı. Nə çarə eləsək də, özümüzlə apara bilmədik.
Axşam üstü ermənilər bizim izimizə düşüb üstümüzü kəsdirdilər. Nemət
dayı bizi meşənin içinə ötürüb özü iyirmiyəcən silahlıyla atışmağa başladı. Biz
iki hissəyə bölünüb meşənin dərinliyinə doğru irəliləməyə başladıq. Elə bir az
getmişdik ki, dalıma şəllədiyim altı aylıq körpə qızım ağlamağa başladı. Hamı
dönüb narazı halda mənə baxdı. Hətta qoca qaynanam da üstümə çımxırdı:
-Kəs
onun səsin!
Şəllədiyim
şalı arxadan açıb uşağı qucağıma aldım. Elə gedə-gedə döşümü çıxardıb ağzına
saldım. Azalıb on saat olsun boğazımdan öküz əməyi keçməyib, südüm hardan
olasıydı? Amma bir müddət balaca qızım səsini kəsib döşümü marçıldatdı. Heç iki
dəqiqə keçməmiş yenə zarıdı. O birini də saldım ağzına. Buzov anasının yelininə
süd yensin deyə dümsüklədiyi kimi bir- iki dəfə dümsükləyib, bərkdən qışqırdı:
yəni burda süd yoxdur, niyə məni aldadırsan?
Yenə
hamı qorxa-qorxa mənə tərəf baxdı. Barmağımı saldım ağzına, xeyri olmadı.
Dilimi saldım ağzına, daha bərkdən qışqırdı. Neyləyim mən, ay allah?! Burada əllidən
çox adam var, mən onların qanına necə bais olum?!
Çarəm
kəsildi, əlimi qapadım körpəmin ağzına... Hərdən əlimi çəksəm də, uşaqdan səs
çıxmadı. Bir az gedəndən sonra qollarım keyləşdi. Boynu sallanırdı. Dedim öldürmüşəm
yəqin. “Allah, keç günahımdan” deyib yenə dalıma şəllədim.
Gecəni
meşənin içiylə getdik. Hərdən dayanıb nəfəsimizi dərsək də, dayanmadan
gedirdik. Bu həm bizi donmaqdan qurtarırdı, həm də təqib edən ermənilərdən mümkün qədər
uzaqlaşırdıq...
Qalın
meşə vaxtı müəyyənləşdirməyə mane olurdu. Açıqlığa da çıxmağa qorxurduq. Öldü
bildiyimiz silahlı kişi gəlib bizə çatmışdı. Yaralansa da, yarasını bağlayıb
ermənilərin gözündən yayınaraq qaça bilib. O danışırdı ki, o biri dəstəni
daşnaklar tutublar. Elə başları onlara qarışdığından bizi unudublar. Kişi
deyirdi ki, uşaqların, qadınların çığırtısından gün üzü tutulurdu. İri tonqal
qalayıb uşaqları, qocaları diri-diri tonqala atırmışlar...
Bir
az da gedəndən sonra zəif gün işığı gördük. Demək səhər açılmışdı. Mənim isə
ayaqlarım getmirdi. Qabaqda gedən bələdçimiz geri qayıdıb cevincək öz ərazilərimizə
çatdığımızı bildirdi. Yorulub əldən düşmüş adamlar dinclərini almaq üçün buz
kimi torpağın üstünə çökdülər. Üzümü içimizdəki yaralı da olsa, yeganə silahlı
kişiyə tutub ağlaya-ağlaya dedim:
-Dayı,
day mən bunu apara bilmirəm. Əlimi ağzına basmışam, ölüb... Öldüyünnən
ağırlaşıb da. Bəlkə bir xırda çala qazasan... basdıraq?
Dəstədəki
adamlar günahkar baxışlarını yerə dikmişdilər. Anam isə körpəni dalımdan alıb
qolları üstə tutdu. Sağa-sola gəzdirə-gəzdirə sözsüz, səssiz bir ağı başladı.
Qadınlar anama qoşuldular. Nə baş verdiyini anlamayan uşaqlar isə kərəvəngi
qalmışdılar.
Kişi belindən açdığı iri qəməni
torpağa sancıb donmuş yeri çətinliklə qazırdı. Təxminən iyirmi dəqiqəyə balaca
qəbir hazır oldu. Anamın şala büküb qəbirin
yanında yerə qoyduğu körpəni son dəfə görmək üçün əyildim. Şalı aralayanda
diksindim. Gördüyümdən əvvəl qorxdum – yuxu, yaxud da əcaib şey görünmüşdü
gözümə bəlkə?!. Gözümü yumub açdım və yenə eyni şey: uşaq gözlərini geniş açıb
mənə baxır və gülümsəyirdi!...
Əllərini
göyə tutaraq öz dilimizdə ucadan dua
oxuyan kişi də, deyəsən, mənim gördüyümü görmüşdü. Əli göydə, duası ağzında
yarımçıq qalmışdı. Adətən, uşaqlar öləndə fatihə verməz, “Yasin” oxumaz, allah
rəhmət eləsin deməzdilər. Onlar cənnət quşu sayılarlar. Ona görə kişi fatihə
oxumur, eləcə öz dilimizdə tanrıyla dərdləşir, dua-səna edirdi. İndi gördüyündən
o da şaşırmışdı. Amma duasını yanılsa da, birtəhər bitirib “ya rəsu allah” deyə bildi və yenə uşağa tərəf boylandı.
Gördüyünün həqiqət olduğuna əmin olan kişi qazdığı qəbirin
torpağını içinə töküb dedi:
-Vaxtdır,
bu uşaq allahın bizə işarəsini çatdırdı. Hələ hər şeyin sonu deyilmiş. Hazırlaşın, yola düşürük...
19
iyun 2014
TANKÇININ OĞLU
Balıqların susmağı qorxulu deyil, qorxulusu insanların susmağıdır.
Balaca Sadiqin qəbirdə düşündüklərindən
-Ata, bu balıqlar niyə belə çabalıyır?
-Onlar
quruda nəfəs ala bilmirlər, su olmasa, ölərlər.
-İndi
öləcəklər?
-Hə.
Qəhərləndim:
-Mən
istəmirəm onlar ölsün...
-Onda,
çayın qırağında balaca gölməçə düzəlt,
balıqlarını burax ora. Amma bax ha,
tullanıb qaçmasınlar.
Atam
deyən kimi elədim. Naharacan
qarmaqla çoxlu balıq tutduq.
İlk
dəfə balığa gəldiyimdən atamı bezdirmişdim suallarımla.
-Ata,
balıqlar niyə danışmır?
-Onların
dili olmur, ona görə.
-Bəs
niyə qışqırmırlar? Quş kimi, delfin kimi?
-Mən
bunu bilmirəm, məktəbə gedəndə müəlliminnən
soruşarsan.
***
Elə
buradaca – Bəsid çayının sahilində
atamla nahar elədik. Nahardan sonra
atam traktoru işə salıb xeyli
yer şumladı. Axşama yaxın mənim yanıma gəlib sellofan torbanı göstərib dedi:
-Balıqlarını
yığ bura, aparaq anan qızartsın, yeyək.
Başımı aşağı salıb günahkarcasına dedim:
-Ata, mən onları çaya buraxdım...
Ata
heyrətlə :
-Nə
danışırsan, Sadiq? Niyə buraxdın?
-Onlar
mənə dedilər ki, biz bu gölməçədə boğuluruq, bizi azad et. Mən də buraxdım
suya...
***
Evə yenicə
çatmışdıq. Atam traktorunun yanında
qurdalanırdı. Mən də həyətimizdə
oynayırdım. Anam çağırsa da, bir azdan gələcəyimi dedim.
Neçə
gün idi sakitlik idi. Ermənilər atmırdılar. Elə bunu fikirləşirdim ki… Sav kəndi yaxınlığındakı Qızlar ağacı deyilən yerdən tankdan qəfil atılan mərminin
zəhmli səsi Bəsid çayı boyunca düzülmüş kəndlərin adamlarını qorxuya saldı. İkinci mərmi atam olan yerə tərəf düşdü.
Mən qorxsam da, atama tərəf qaçdım. Amma
ata sağ idi və o da mənə tərəf qaçırdı. Di gəl ki, çatmadı: üçüncü mərmi düz ayağımın altına düşdü. Bir onu gördüm ki, bədənim param-parça olub. Tək
ona sevindim ki, atam mənə çatmadı. Çatsaydı, o da öləcəkdi.
***
Öldüm.
Nolsun e. Adam ölər də. Amma təkcə ölümümə görə pis olmamışdım. Atam –
rayonumuzun adlı-sanlı traktorçusu, bu güclü adam mənsiz yaşaya bilmirdi. Anam
bir tərəfdə, o bir tərəfdə xəstə kimi döşəli qalmışdılar. Çox istəyirdim,
yalvarım, onlara deyim ki, belə eləməyin, mən pis oluram. Amma eyzən balıqlar
kimi danışa bilmirdim, ya da bəlkə onlar mənim səsimi eşitmirdilər?
Səhəri
məni dəfn etdilər. Atam qəbrimin üstündə hönkürə-hönkürə dedi:
-Sadiq!
Sənə söz verirəm: qəddar düşmənnən
intiqamını alacam!
Səhəri
atam traktoru aparıb təhvil verdi. Neçə il əvvəl əsgərlikdən gətirdiyi və sevə-sevə
qoruyub-saxladığı tankçı paltarını geyinib könüllü döyüşçülərin yanına getdi. Mən
qaçıb onun yolunun üstünü kəsdirdim, qışqırdım, yalvardım ki, getməsin! (Amma o məni görmədi, səsimi eşitmədi!) Axı o
da gedib tankçı olacaq. Tankdan mərmi atacaq, bu mərmilər uşaqlara dəyəcək...
Yox, atamın traktor sürməsini, yer əkməsini istəyirdim... O adam öldürə bilməz!
***
O
gündən kəndlərimizdə traktorlar susdu. Əvəzində tanklar gurlamağa başladı.
Hər
dəfə tankdan atəş açılanda mən qəbirdə qorxurdum... Atam bunu bilmir, bilsə, atəş
açmaz.
22 iyul 2014
Yorumlar
Yorum Gönder