AZAD QARADƏRƏLİ SEHR (esse)
AZAD
QARADƏRƏLİ
SEHR
(Dostum Qulu Məhərrəmlinin
60 yaşına)
Yazıma bir pritça ilə başlayıram, özü də heç bir şərh vermədən. Zatən, görünən dağa nə bələdçi axı?
Bu əhvalatı Uinston Çorçill Con
Kennedinin müharibə vaxtı Londonda səfir
olan atasına danışıb. Pritça belədir: "İki qrubağa olur, süd
bidonuna düşürlər, çıxa bilmirlər. Qurbağanın biri ruhdan düşür, əlini saxlayır
və gedir bidonun dibinə. O biri çırpınmaqda davam edir, səhərə qədər çırpınır,
çabalayır və səhər açılanda artıq yorulur. Bu da əlini saxlayır, ancaq südə
batmır. Məlum olur ki, səhərə qədər südü çalxadığı üçün yağ əmələ gəlib və bu
yağın üstündədir. Beləcə, çalışqan qurbağa atılıb bidondan çıxır". Bunu
danışan Çörçill səfir Kennediyə deyib ki, ser, bax, mən həmin o çabalayan
qurbağalardanam.
Çörçillin sözü olmasın, çabalamaq
lazımdır....
Öz sənətində Çörçil qədər əzmkar olan
bir insandan danışmaq istəyirəm.
***
AzTV ki var, şəhər içində şəhərdir
bura. Ölkə dağılsa da, buranın öz qanunları, çəki-tərəzisi,
yapısı-tapısı vardı. Məsələn, burda yeyib-içənlərə şəhərin heç yerində rast gəlməzdin – indi orda vəzifədə olanların çoxu bir zamanlar
buranın bərk vuran yazıçılarının, tele-jurnalistlərinin, rejissorlarının
araqdaşıyanı, qulluq göstərəni idilər. Burda xərclənən pullar da şəhərin başqa
yerlərində olası deyildi – kimin pulu çoxdur, özünü bura verirdi. Kimi
poza verib çıxış edir, kimi atası haqqında veriliş çəkdirir, kimi də hamının
atası haqqında danışmağa gəlirdi həvəslə...
Amma
yox, buradakı yaradıcı adamları da heç yerdə görməzsən. Deyim ki, buradakı
günah əhlinin bütün günahlarını 3-5 adam yuyur. Yəni bu böyük müərriki əsl ziyalı ağlına malik bir neçə adam hərəkətə
gətirir. Həmyerlim olsa da, uzun müddət
AzTV-nin tam gücü ilə işləməsində və
kanala baxımlılıq gətirən verilişlər hazılanmasınmda böyük qatqısı olan (söhbət
baxımlı verilişlərdən gedir təbii ki) Qulu Məhərrəmli ilə mən başqa yerdə yox,
məhz bu “mühərrikin” özündə görüşdüm. Burada onu tanımayan, onun hörmətini gətirməyən,
ondan tapşırıq almaq üçün növbəyə durub xoşbəxt olmayan yox idi. (O bəlkə də
yeganə telejurnalist idi ki, buradakı içki məclislərində iştirak etmir, öz nəfsini
və ziyalı imicini inadla qoruyub-saxlayırdı.)
Bir
gün mərhum Eldar Baxış dedi ki, günorta düşərsən çayxanaya. (Mən bir ilə yaxın
idi ki, Eldarın köməyi ilə radioda işləyirdim.)
Getdim və gördüm ki, Məmməd Aslandır, Qulu Məhərrəmlidir və Eldar Baxışdır,
oturub çay içir, söhbətləşirlər. Eldar özünəməxsus şən əhvalla Məmməd Aslanı “böyük şair”, Qulu
Məhərrəmlini isə “ekranda ən vicdanlı jurnalist” kimi mənə təqdim edib, sonra
eyni ahənglə dedi:
-Qulu
müəllim, bu, Azad Qaradərəlidir...
Qulu
müəllim yalnız onda müşahidə etdiyim çox diri və şən bir əhvalla qalxıb mənimlə
görüşdü, indi unutduğum hansısa xoş sözlər
də dedi.
Biz
orada tanış olduq və tanışlığımız dostluğa çevrildi. Bu xarizmatik adamda incə
yumor, xoş aura və iti zəka elə çuğlaşmışdı ki, bu keyfiyyətlərin hamısı bir
yerdə hər adamda olmur.
Biz
Qulu müəllimlə həmyaşıdıq. Yəni altmışı tamamlasa da, qəti verməzsən ona bu
yaşı. Həmişə gülən gözləri, üzündəki sehrli təbəssüm onu şux və cavan saxlayıb.
Biz
tərəflərdə qızılgülün bir növü var: həmişəbahar deyərlər. Yaz, yay, payız bu
gülün üstündə təzə açmış güllər görərsən.
Qulu müəllim də belədir. Ən ağır məqamlarda belə, onun üzündən təbəssüm əskik
olmur.
Qulu
müəllim adi jurnalist deyil, həm də yüksək erudisiyalı ziyalıdır. Maşınında
qabaqcıl nəşriyyatların ən son kitabları
olur həmişə. Ardıcıl mütaliəsi onun bir alim kimi həmişə formada olmasına da
imkan yaradır.
***
Gün
gəldi ki, daim hərəkətdə olan, öz hərəkəti
ilə AzTV deyilən bu ağır dəyirmanı da fırladan Qulu Məhərrəmliyə buranı
qısqanmağa başladılar. Əvvəlcə öz əlləri ilə qurduğu “Səhər” verilişini əlindən
aldılar. (Əslində o verilişin kökünə balta çaldılar. Qulu müəllimdən sonra o
verilişə daha baxdım deyən görmədim.) Və gün gəldi ki, şirkətdən çıxmasını istədilər. Bəli, məhz istədilər. Vaxtilə
aşağı vəzifədə olan və vaxtilə Qulu müəllimin yanında dayanmağı ilə fəxr edən
“dost” indi başa keçmişdi və burada özündən savadlıları, nüfuzu olanları görmək
istəmirdi. (Yadıma düşdü ki, N.Xudiyev sədr gələndə bu “dost” maliyyə işində
törətdiklərinə görə həbs olunacağından qorxub necə yumağa dönmüşdü və hamının
ondan üz döndərdiyi bir vaxtda Qulu müəllim ona necə ürək-dirək verirdi. Ah,
nankorluq!!!)
Qulu
Məhərrəmli mübariz adamdır, amma bu ədalətsizliyi taleyin istehzası kimi qəbul
edib ona qarşı mübarizə aparmadı, illərin uzunu çörək kəsdiyi “dostu” kimi
baltanı kökündən vurmadı, hədyanlar danışmadı, çox ağayana davrandı, deyəsən
heç AzTV-dən gedişinə təəssüflənmədi də. Bircə
müsahibə verib dairənin qapandığını dedi və üz qoydu yeni üfüqlərə...
***
Hər
insana nəsib olan iş deyil ki, özündə bir neçə sənət sahəsini birləşdirə
bilsin. Qulu müəllim televiziyaçı kimi mahir televiziyaçıdırsa, alim kimi mahir
alim, müəllim kimi də bir o qədər mahir müəllimdir. Təsadüfi deyil ki, BDU-da dərs
dediyi tələbələrinin onun haqqında dilləri ağızlarına sığmır. Hətta, bir qız
onun feysbukdakı şəklinə beləcə şərh yazmışdı: “Mənim bircə gözəl və sevimli müəllimim!”
Qızın
sözünü qəribliyə salmadan deyim ki, bu adamda doğrudan da bir hüsn, kişi gözəlliyi
və bizim tərəfdə deyildiyi kimi kişi şahqəvətliyi var.(Bu sözün ədəbi dildə uğurlu qarşılığı olmadığı üçün dialektdə
olduğu kimi yazdım. Mənası, təxminən şah duruşlu, şah vüqarlı, şah baxışlı
anlamlarına gəlir.)
Mən
bir yazıçı kimi Qulu müəllimi daim müşahidə etmişəm. Axı bir surət yaradarkən gözlərinin önünə real həyati
obrazı mütləq gətirməlisən. Nə yazıqlar ki, zəmanəmizdə hərtərəfli zəngin olan belə həyati prototiplər indi qəhətə çəkilib. Heç
özünə deməmişəm, mən romanlarımda bir
neçə obrazı yaradarkən Qulu müəllimin insanı tilsimləyən simasını gözlərim önünə
gətirmişəm. Konkret olaraq “Kuma-Manıç çökəkliyi” romanımın (əsər “Yazı” dərgisində
hissə-hissə dərc olunub, kitab kimi də çapa hazırlanır) əsas qəhrəmanlarından
olan Haşım bəyin obrazını yaradarkən həmişə Qulu müəllimi gözümün önünə gətirərdim.
Kitablarımın
ilk nüsxələrindən birini hökmən ona vermişəm həmişə. Lap az tanındığım
vaxtlarda da beləydi, indi də belədir. Onda da vaxt tapıb oxuyar, fikrini deyərdi,
indi də. Bu yaxınlarda xaricə gedərkən özü ilə götürdüyü “Şəhərcik” romanımı
oxuyandan sonra da zəng vurdu. Etik nöqteyi-nəzərdən onun roman haqqında dedikləri
tərifləri burada yazmağım düz olmazdı, amma sizə deyim ki, mən bir neçə gün bu
zəngin və zəng sahibinin səmimi fikirlərinin
əsarətində oldum. O belədir, sənə layiq olanı əsirgəməz: ya söz şəklində,
ya başqa formada.
Dostlarını
göstər, kim olduğunu deyim – belə bir ifadə var. Bir tərəfdə Arif Əliyev, Elçin
Şıxlı, Zeynal Məmmədli, digər tərəfdə Rafiq Əliyev, Ramiz Rövşən, Musa Yaqub
kimi adamlarla daim bir yerdə görərsiniz onu. Bir-birilərindən qidalanmaq
dostların adətidir, deyərlər.
***
Qulu
Məhərrəmli hər şeydən öncə bir televizyonçudur. AzTV-dən sonra çalışdığı “Xəzər”də
də bunu göstərə bildi. Apardığı “Dost məslisi” proqramı qısa vaxtda xeyli tamaşaçı toplaya bilmişdi.
Çoxları dünyada baş verən hadisələrin mahiyyətini bilmək üçün onun apardığı
“Gündəm”ə baxırdı. Mən “baxırdı”nı keçmiş zamanda ona görə deyirəm ki, artıq bu
veriliş dayandırılıb, çünki müdrikliyi, nüfuzu, hörməti artdıqca adamı
qısqananların qarşısına kötük itələyənlərin də sayı artır. Amma bu kötük
adamlar anlamırlar ki, Allahın sevdiyi bəndənin yolunu heç bir vəzifə sahibi kəsə
bilməz, çünki Allah daim Qulu müəllimin başının üstündədir və bu, onun böyük
xoşbəxtliyidir.
Onun
bir xoşbəxtliyi də var: efirdə başqa, auditoriyada başqa, həyatda bambaşqa adam
olmaqdan tamamən uzaqdır. Onun səmimiyyəti buna imkan vermir. Son dərəcə gözəl
dillə, yapışıqlı, çəkici və valehedici tərzilə Qulu Məhərrəmli dinləyicini
ovsunlaya bilir. Şekspir demişkən: “Gələcəyinizi bərbad etməməsi
üçün, danışığınızı qaydaya salın.” O
bunu bacarıb. Öz sehrli səsi, tamaşaçını tovlayan kişi hüsnü və natiqlik məharəti
ilə.
Hə,
onda daha mühüm bir keyfiyyət də var: hamını özünə hörmət qoymağa sanki məcbur
edir. Ən yaxın dostları belə, ona “Qulu müəllim” deyə müraciət edirlər. Elə mən
də!
2014
Yorumlar
Yorum Gönder