AZAD QARADƏRƏLİ “RÜBƏND” ARXASINDAKI İSMİ-PÜNHAN
AZAD QARADƏRƏLİ
“RÜBƏND” ARXASINDAKI İSMİ-PÜNHAN,
yaxud Şəhla Nihanın
nihan mətnləri haqqında yazmaq istədiklərim
Mənim
bir yazar, yaxud onun mətnləri haqqında yazmağım üçün bir motivasiya lazım: ya
gərək adamı uzun illərcə tanıyım, yazı-pozusu gözümün önündə olsun, ya da gərək
o, heç bilmədiyim biri olsun, zira bir kəlməsi, bir cümləsi, bir mətni, yaxud
bir kitabı yolumu onun üstünə gətirsin...
Gördüyünüz
kimi belə yazı tərzinin ikisi də çətindir. Gözünün önündəki su kimi aydın
birinin sözlərindən yazmaq elə suyun özündən yazmaq qədər müşküldür. Heç
tanımadığın birinin sözünü ağzına almaq da elə...
O
mahnıda necə deyilirdi?
“İsmi
Pünhan niyə...”
......................................
Alatoran
yayın evində görmüşdüm Şəhla xanımı. Kitabını mənə bağışlayanda üstündəki Şəhla
Nihan adını görüb diksinmişdim. Qardaşım, hər adamın ağzına alacağı ad deyildi
bu Nihan! Ortada qos-qoca İsmi Pünhan varkən...
.............................
Nə
isə. Uzun zaman adı “Kontramot” olan o kitabı oxuya bilmədim. Elə bil vərəqlərin
arasında nəsə sirli bir şeyin faş olacağından qorxurdum.
Oldu
zatən. Bu hekayələr indiyə qədər Azərbaycan nəsrində heç ratlaşmadığım məqamlarla
dolu idi. Gərgin psixoloji məqamlar, alt şüurda baş verənlər, psixopad, amma
içində işıq gəzdirən obrazlar və ezoterika ilə dolu simvollar...
Elə
ezoterikadan başlayaq.
Mən
bu elmdən – bilmirəm, elm sözü yerinə düşdümü – bir az haliyəm. Yəni
romanlarımda, hekayələrimdə bu motivli səhifələr var, hətta çoxdur...
Dönək
Şəhla xanımın mətnlərinə.
Onun
hekayələrindəki insanlar normal adam kimi görünmür. “Ona elə gəlirdi ki, bu
qadının əsli hardasa gəzib dolanır, burda, böyründə yaşayan isə onun surəti, ya
bəlkə... – beyninin hüceyrələri bu fikirdən qıc olsa da – kabusu idi.” (“Anfilada”
hekayəsindən)
Elə
o mətndə daha çox diqqətimi çəkən bu sözlər də səksəndirdi məni:”...çalışırdı
göz-gözə gəlməsin onunla”. Və bu hekayənin adı “Anfilada” – iç-içə otaqlar demək
imiş. Hansı ki, iç-içə otqların özü də çox mübhəmdir, adamlar bu iç-içə
otaqlardan qorxar, beləsini heç istəməzlər. Sanki sirlərinin dağılacağından
qorxarlar... göz-gözə gəlməkdən qorxduqları kimi...
Numerologiya,
vahiməli səslər, insan duyğusunu sarsıdan hadisələr hekayənin xanım qəhrəmanını
üzür və... nəticədə özünü əsəb dispanserində görür...
Qəribəsi
bilirsiniz nədir? Hekayənin heç bir qəhrəmanının adı yoxdur.
Hətta
o biri hekayələrdə də qəhrəmanlar adsızdırlar. Bu qeyri-adi adamlar başqalarının sezə bilmədiyi şeyləri sezir,
eşidə bilmədiyi səsləri eşidir, duya bilmədiklərini duyurlar. Və elə bu həssaslıq
onların başının bəlası olur. “-Pisəm yenə... Yenə onlar gəlmişdilər. Əvvəllər
divarla qaçırdılar, indi evin içindədirlər.” (“Siçanlı şorba və ya Hantinqton
xoreyası”)
Rəfiqəsinin
təskinliklərinə baxmayaraq o, öz qeyri-adi həssaslığı ilə həyatını daha da mürəkkəbləşdirir.
Başqa bir hekayənin yaşlı-başlı qəhrəmanı isə özü də bilmədən verdiyi bir
sualın toruna düşərək maqik hadisələrin burulğanında boğulmalı olur:
“-Bilmək
istərdin, nə qədər yaşayacaqsan?
-Yox,
nəyə lazımdır bunu bilmək? Nə qədər ömrüm var, o qədər yaşayacam.” (“Kontromot”)
Sonra
parkda ququ quşunun səsi ilə qalan ömürlərini müəyyən etməyə çalışırlar. Kişi
üçün 15 dəfə sələnir quş, qadın üçün 4 dəfə. Və qadında qoxu, əsəb baş
qaldırır, təsadüfən əlinə keçən kitabdan yapon ezoterikasının köməyi ilə “cavanlaşma
nöqtəsinin stimulyasiyası” metodunu öyrənərək özünə tətbiq etməyə başlayır. Təsiri
çox gözləməli olmur: cavanlaşma prosesi sürətlə başlayır. O qədər sürətlə ki, qadın
tanınmaz dərəcədə cavanlaşır. İndi də kişi əsəb sarsıntısı keçirir. Məcbur olub
başqa şəhərə köçməli olurlar...
Qadın
burada gənc qıza, ən sonda isə körpə uşağa çevrilir.
Ququ
quşunun “söylədiyi” 4 ilin tamamında qadın-körpə dünyadan köçür...
Şəhla
Nihanın “Rübənd” (bu da bir sehrli pərdənin oluşundan xəbər verir), “Kontromot”,
“Binar”, “Sintez” kitabları bir hava üstündə yozulan yuxu kimidir. Bu yuxunun
sonunda ədəbiyyat var. Heç kimə, heç nəyə bənzəməyən nəsr. Bəlkə də Azərbaycan ədəbiyyatında
bir ilkdir bu mətnlər – psixoterapik, ezoterik-magik motivlərlə zəngin, insan
duyğularının həssaslığından doğan çılğınlıq və “yeni həqiqətlər axrarışı” (“Sintez”).
21.03.2022.
Yorumlar
Yorum Gönder