AZAD QARADƏRƏLİ MÜƏLLİMİM, DOSTUM, SİRDAŞIM...
PROFESSOR RAMİN ƏHMƏDOV VƏFAT ETDİ!
AAD QARADƏRƏLİ
MÜƏLLİMİM, DOSTUM VƏ SİRDAŞIM...
APİ-nin mənə qazandırdığı dostlardan biri, heç şübhəsiz, o vaxtlar aspirant olan, sonralar professor vəzifəsinəcən yüksəlmiş Ramin Əhmədov idi. Ramin müəllim haqqında da geniş danışıb oxucuları yormaq istəmirəm. Mənim müəllimimə bir məktubum var. Zənn edirəm ki, “Yuxın-uzaq dostlara məktublar” kitabımda yer almış o məktubda müəllimimin, dostumun obrazını yarada bilmişəm.
MÜƏLLİMİM,
ƏDƏBİYYATŞÜNAS-ALİM
RAMİN
ƏHMƏDOVA
Hörmətli Ramin müəllim, salam.
Az.TV-də dünya səviyyəli sənətkar və
görkəmli alim Mehdi Məmmədov haqqında veriliş gedirdi və mən bu sənət
korifeyinin ömür yolunu seyr etmək üçün hər işi bir kənara buraxıb oturmuşdum
ekran qarşısında.Elə bu vaxt Mehdi Məmmədovun nadir fotolarından olan bir şəkli iri planda
ekranda göstərdilər: o,zolaqlı yun köynəkdə əyləşib,çox diqqətlə hara isə
baxır,sanki ov üstünə sıçramağa hazırlaşan pələngə bənzəyirdi!
Yox!Bu bənzətmə tək mənə aid deyil
ki…Bunu sevimli müəllimim,əziz dostum, Siz Ramin Əhmədovla birlikdə 33-34 il əvvəl
“kəşf etmişik”…
Ramin müəllim!Biz oxuyan illər(1972-76)
APİ-də rüşvətin çiçəklədiyi illər idi.Amma o da vardı ki,mənə və mənim kimilərə
dəymirdilər.Və bu məktəbən məni soyumağa
qoymayan bir-iki müəllimimiz vardı
ki,onlardan biri və bəlkə də birincisi Siz idiniz.Sizdən başqa orada mənim
böyük ehtiramla yada saldığım Əlisa
Şükürlü,Bayram Əhmədov,Əbdül Əlizadə kimi sevimli müəllimlərim,Mirzə
Feyzulla,Ə.Dəmirçızadə,İ.Şıxlı kimi ustad bildiyim şəxslər vardı.
Siz rus və xarici ölkələr ədəbiyyatından
seminar aparırdınız,mühazirə müəllimimiz isə İ.Şıxlı idi.Bu son dərəcə
ciddi,qaraqabaq kişi ilə aramızdakı ”soyuq”luğu Siz götürürdünüz.
“Anna Karanina”nı (o müdhiş birinci
cümlədən başlayaraq),”Hacı Murad”ı,
“Ərəfə”ni,”Dubrovski”ni,”Zəmanəmizin
qəhrəmanları”nı,”Cinayət və cəza”nı,eləcə də “Faust”u,”İlahi
komediya”nı,”Hamlet”i ilk dəfə Siz mənə adam dilində başa saldınız.
Artıq biz dostlaşmışdıq.Auditoriyadan
çıxandan sonra çayxanada,kafedə,bəzən də eləcənə başmaqseyrində seminarda deyə
bilmədiklərininzi mənə söyləyirdiniz.Artıq
mənim ilk qələm təcrübələrimdən də xəbərdar idiniz…Və biz Mehdi Məmmədovu
da birlikdə o zamanlar “kəşf etmişdik”.Xüsusilə o şəkil ətrafında saatlarla müzakirə aparmışdıq…
…Az.TV-də veriliş gedə-gedə Sizə zəng
elədim.”Hə,belə olar də,hansısa verilişdən-verilişə yada düşürəm…”,yarızarafat-yarıgerçək
dediyiniz söz mənə dəysə də, üz vurmadım.”Ramin müəllim,söhbət Mehdi Məmmədovdan
gedir,hələ Siz bu şəklə diqqətlə baxın…”
Sonra yenə nələrsə dedim,dedim…Və
bir də baxdım ki,cib telefonumda cınqırtı da yoxdur.Demiyəsən,konturum
qurtarıb,mən də boşuna danışıram…
“…Bir gənc qız Çernişevskiyə məktub
yazaraq ona heyranlığını gizlətmir.Növbəti məktublarının birində isə onun
arvadı olmaq istədiyini bildirir.Çernişevski isə ona cavabında bildirir ki,mənim
həyatm təzyiqlər,həbslər,sürgünlər,bir sözlə əzablarla dolu olacaq.Əgər bunlara
dözə biləcəksinizsə,buyurun,gəlin.O fədakar qız bunları bilə-bilə “Nə etməli?”nin
müəllifi olan o dahi ilə ailə qurur.”
Sizin cümlələrinizdir bunlar.Vaxtilə
bizi gələcək milli azadlıq hərəkatına bilərəkdənmi,bilməyərəkdənmi beləcə hazırladınız.
Biz oxuyan illər Azərbaycanda bir
oyanış dövrü idi. M.İbrahimov,R.Rza,B.Vahabzadə,İ.Hüseynov(Muğanna),Ə.Əylisli,Anar,İ.Məlik-zadə,M.Araz,Ə.Kərim(artıq
o,dünyasını dəyişmişdi,amma ədəbi hadisə kimi hər gün yanımızda idi,indi də həmçinin),Q.Qarayev,A.Məlikov,F.Əmirov,Mehdi
Məmmədov,Tofiq Kazimov,Adil İskəndərov,Rəşid Behbudov,Asif Əfəndiyev(heyf ki,bu
ziddiyyətli dahinin istəyi ilə arzusu bir-birini tamamlamadı və nəticədə qoymaq
istədiyi problem elə problem kimi də qaldı),Rüstəm İbrahimbəyov,Səttar Bəhlulzadə,Toğrul
Nərimanbəyov,Əbülfəz Elçibəy… Bu insanlar sözün əsil mənasında intibah adamları
idilər və Azərbaycanda o dövrü yarımintibah dövrü kimi xarakterizə etmək
olar.Əsl intibah isə zənnimcə 1905-1920-ci illər arasında baş vermişdi.Fəqət o
da yarımçıq…
Səməd Vurğunu sevmədiyimi
bilirdiniz.Amma bir gün “sabah Azdramada “İnsan” dramı var,mütləq bax…Mehdi özü
oynayır…” dediniz.Mehdi əl
bulamışdısa,demək
getmək gərəkirdi.Zalda iynə atsaydın yerə
düşməzdi.Mehdi isə zamanı durduracaq qədər sehrli,insanı ovudacaq qədər şəfqətli,dünyanı
nurladacaq qədər ağappaq səsiylə hayqırırdı:”Qalib gələcəkmi cahanda kamal?”
Bir neçə gün o tamaşanın aurası ilə
nəfəs aldıq.
Hələ “Canlı meyit”də Protosov,hələ
“Dəli yığıncağı”…Hər bir böyük kişinin arxasında gözəl bir qadına həmişə
ehtiyac var deyimi elə-belə yaranmayıb ki…Mehdinin Mehdi olmasında Şəfiqə Məmmədova
az rol oynamamışdı…
Ramin müəllim,Siz böyük müəllim,fəqət
çox astagəl alimsiniz.Bu ifadəmə görə
çox-çox üzr istəyirəm: gözəl yazılar yaza bilən bir alimin əlindən qələmi Siz nəyə
görə alırsınız?Axı o alim Ramin Əhmədova müəllim Ramin Əhmədov niyə mane
olur?Bu da bizim bir bəlamızdır: Vidadi Məmmədov kimi dahi bir insan
danışa-danışa köçdü bu dünyadan,cəmi-cümlətanı bir-iki yazısı qaldı…
…Mənim “Aşiqlər” kitabım əsasında sənədli
film çəkilirdi.Tərəddüd etmədən çıxışçı kimi Sizi plana saldırdım.Amma öz
aramızdır,Sizi yola gətirənəcən,mənimki mənə dəydi.Di gəl, mən əl çəkmədim - nə
elədiyimin fərqindəydim axı.”Aşiqlər” kitabımın ikinci nəşrinə ön söz də
yazdınız,filmdə də dahiyanə çıxış yapdınız.Hələ Məhəmməd bəy Aşiqlə Aşıq Pərinin
münasibətindən bir ləzzətlə,luğablı şəkildə danışdığınız parça!Yeri gəlib,Aşıq
Pəri barədə daha şirin-şəkər bir söhbətiniz var ki,burada onu təkrarlamaq zərurəti
duydum.Deyilənə görə,Aşıq Pərinin balaca oğlu Mustafa bir dəfə dırnağı ilə
anasının yanağını cızır.Ovdan qayıdan həyat yoldaşı Pərini bu halda görüb bədahətən
deyir:
Mahi-ruxində ləkə
tək nədi,ya Pəri?
Pəri Məhəmməd Peyqəmbərin barmağıyla
məşhur “ayı parçalaması” əhvalatını oğlu Mustafanın da onun üzündə açdığı xəttlə
qarşılaşdıraraq ,-Məhəmməd Peyqəmbərin bir adı da Mustafadır - deyir:
Mustafa
barmağıdır,parçalayıbdır qəməri…
…Oğlanlarınızın xarici ölkələrdə
oxuyub-işləməsi Sizi üzür,bilirəm.Bir
ata kimi nigarançılığınızı başa düşürəm.İstəyirsiniz ki,onlar Sizin yanınızda
olsunlar.Amma onlar Dünyanın yanındadırlar,narahat olmayn.Onlar bir gün Azərbaycana
daha dolu qayıdacaqlar….
Ramin müəllim!Bəhlul Behcət haqqında
kitabım təzəcə çapdan çıxıb.Tezliklə Sizə göndərəcəyəm.Kitab əsasında çəkiləcək
filmin də çəkilişlərinə hazırlıq gedir.Və Sizə daha bir xəbərim var: “Arazbar”
adlı roman üzərində işləyirəm.İnşallah,növbəti ildə bitirəcəyəm.Çox istərdim
ki,əlyazmasını birinci Siz oxuyasınız…
…Allah Mehdi Məmmədova rəhmət eləsin….
…Həmişə cavan,həmişə gümrah
olasınız,Ramin müəllim!
…Allah bizi intibah həsrətində
qoymasın…Amin.
Tələbəniz və dostunuz
AZAD QARADƏRƏLİ
24 may 2009-cu il.
***
S.A.
(Söz Ardı) 1.
Ramin müəllim sonralar mənim kitablarımın təqdimatında iştirak etdi,
fikir söylədi, təsisçisi və baş redaktoru olduğum “Yazı” dərgisinin daimi
oxucusu oldu. Lakin amansız xəstəlik onun əl-qolunu bağladı. Müəllimimiə can
sağlığı arzulayır və tezliklə sıralarımıza qayıtmağını Yaradandan diləyirəm.
2021
Çox kədərliyəm. Bu sətirləri göz
yaşı içərisində yazıram. Əziz müəllimim, dostum, mətnlərimin ustad məsləhətçisi,
“Əllidən bir kəm” romanımın mövzusunu mənə ürəklə bağışlayan, hər uğuruma öz
uğuru kimi sevinən professor Ramin Əhmədov vəfat edib! Könül quşu daha o gözəl
sözləri ötməyəcək. Ağır təbiəti ilə kitablarımın təqdimatında yorum yapmayacaq.
Sevinc deyilən o insani nəsnəni mən gözəl müəllimimdən bir daha duymayacam...
Son söz kimi sevə-sevə tədqiq
etdiyiniz, "Əllidən bir kəm"də onun obrazını yaratmağıma vəsilə olduğunuz böyük Caviddən nümunə gətirim:
Həyat var ki, ölümdən
də zəhərli...
Yaşamaq da xoşdur,
ölmək də xoşdur,
Qayəsiz həyatda ölüm
də boşdur...
Əlvida ustad! Rahar yat. Yerin qu tük olsun.
17.07.2022
(“Məndən sonra” memuar romandan)
Yorumlar
Yorum Gönder