AZAD QARADƏRƏLİ POLAD KİMİ HEKAYƏ
AZAD QARADƏRƏLİ
POLAD
KİMİ...
Milli Qəhrəman general
Polad Həşimovun xatirəsinə
PROLOQ
Dəmir insan işi deyil. Heç şeytanın da xəbəri yoxdur. O burda doğulmadı. Göy mənşəlidir. Ona görə dəmirlə insanın bağı o qədər də etibarlı deyil...
Hər
zaman dəmir kəsib insanı. Qanını töküb. Bədənini qurda-quşa yem edib... Dəmirdən
qorxub insan. “Cin dəmirdən qorxan kimi...” Hətta cin də qorxub dəmirdən...
Amma
insan dəmirdən heç ayrılmadı ki. Paslanmasın deyə onu cilalayıb polad elədi. Hə,
bax, insan poladdan sonra dəmirə təzədən qayıtdı. Vuruldu ona. Hətta oğluna
Polad adı da qoydu.
Çox
Poladlar gəldi keçdi, amma bizim qəhrəmanımız Poladdan heç olmadı. O bir ordu,
o bir qoşun, o bir sərkərdə, paşa idi... General Polad...
Gözüm
oxucu! Sənə gözüm dedim, ondan ki, gözümün qarasını aparan, mənə gah acılar
yaşadan, gah nəşələndirən, bəxtiyar edən bu sətirləri yazanda hərdən sən
gözümün önündən keçmisən. Sənə güvənib yazmışam. Sənə dayanıb yazmışam. Polad
adamdan yazanın polad da səbri olmalı. Bunu sənnən almışam. Sən hər zaman mənim
arxam, dayağım, tənqidçim, qardaşım, bacım oldun. Sən dövlətimsən, sən
torpağımsan, sən Vətənimsən... Elə sən də polad kimisən. Poladı sən doğdun,
oxucum – xalqım! Bu kitabı sənə həsr etdim...
DOĞULUŞ
Hərbçilərin
doğuluşu anadan olduqları gün deyil ki. Hərbçi doğulanda minlərdən,
milyonlardan biri kimi gələr dünyaya. O o zaman doğulacaq ki, ilk addımını əsgər
çəkməsi ilə atacaq...
Polad
da ilk dəfə orduya gedəndə sehrlənmişdi sanki. Elə bil onu ayrı bir aləmə
atmışdılar. Gözünü yumub-açanda anladı ki, bu onun yenidən doğuluşudur. Heç
darıxmadı, heç çəkinmədi, heç qorxmadı burda. Yüngülcə evlərinin, ana mehrinin,
dost-tanışın xiffətini elədi, vəssalam. Bu da tezliklə ötüb keçdi. Əsgər
kazarmasında keçirdiyi ilk gecə də onu sehrlədi. Başa düşdü ki, uzun illərdir
özünü axtaran bu gəncin yeri elə buraymış.
2.
ANA
Mən
general anasıyam. Mətbəx generalı deyil, döyüş generalı. Mənim oğlum orduya itməkdə
olan inamı və zabit şərəfi adını qaytardı. O, polad kimi qırıldı, əyilmədi. O
vurulmağı ilə düşmənə qalib gəldi.
Bilmirəm hansısa böyük adam deyib ki, türklər ya hicrət edər, ya ölərlər,
əsla qul olmazlar.
Bizim
xalq da qaçqın düşməmişdi, hicrət etmişdi. İnşallah ordumuzun sayəsində indi öz
torpağına qayıdacaq. Polad da ölmədi, şəhid oldu. Elə bu da hicrətdi – bu
dünyadan o dünyaya hicrət.
Mənim
balam o dünyanı da şərəfləndirdi. Aydınlatdı oranı da. Ardınca neçə-neçə mərd
balamız onun yolunu getdi. Tam üç min şəhidimiz var. Onlar Poladın
qardaş-bacıları, mənim də övladlarımdır. Mənum qədər çoxuşaqlı ana dünyada tapa
bilməzsən. Mən çox xoşbəxt anayam. Poladın, Poladların anasıyam axı!..
3.
ÖVLAD
Atam
bizə bir miras buraxdı: Polad ad. O adın bəlkə mənası adi dəmirin cilalannması
kimi gələr bəzilərinə. Yox. O kişi adıdır. Bir nəslin – təkcə bir ailənin yox,
bir xalqın adınnan danışa bilmək səlahiyyəti olan kişi. General Polad Həşimov.
O
bizə mal, pul, sərvət qoymayıb... Yox, sərvət qoyub əslində. Bu günə deyil, gələcəyə
hesablanan sərvət. Şax dayanmaq, ardınca bir ordunu apara bilmək, özünnən sonra
böyük ehtiram qazanmaq, kitablara düşmək, söhbətlərə mövzu olmaq. O təkcə bizim
atamız deyilmiş, neçə-neçə əsgərin, gənc zabitin atasıymış.
Atamız
general idi. Amma həm də Atatürkə verilən “paşam” sözünü də bizə doğma etdi.
Əsgərləri necə ürəklə paşam deyir!
Mən
də o paşanın əsgəri olmağı arzulardım. Nə olsun oğluyam – bu fiziki, bioloji
haldır. Paşanın əsgəri olmaq, yolçusu olmaq bir başaq aləmdir.
Paşam!
İcazə verərmisən izinnən gəlim?!
Açdığın
izin mübarəkdir, paşam!
4.
QADINI
Mənə
danışmaq növbəsi çatmadı ki. Yox, yox, o, mühafizəkar deyildi. Sadəcə, öndə
anamız varkən, mənim danışmağım düz olmaz. Amma iki kəlmə sözüm var: belə bir
generalın qadını olmaqdan şərəfli ad tanımıram. Fərqi yoxur, o bu dünyadadır,
ya o biri dünyada. Harda olsa, oranı nura qərq edəcək gücə sahibdir . Mən də
ora tələsərdim, amma hələ bu dünyada onun balalarının gələcəyinə fanar olmam
lazım... Gözlə, sevgilim! Onsuz da, orada böyük bir ordun olduğunu bilirəm.
Orda da komandansan. Sənə layiq sözlər deyə bilmədiyimçün bağışla məni. İlkim də,
sonum da sənsən. Yarannan öpürəm.
5.
ƏSGƏRİ
Mən
onun əsgəri olmadım ki. Onu heç görmədim. Amma heç gözüm önünnən də getmədi. Mən
onun yoluna mail oldum. Onun vurulmasına heyran oldum. Vurulasan, şəhid olasan,
amma düşməni ölümünlə məğlub edəsən. Şəxsən mən onun ölümünnən sonra and
içmişdim. O andı heç yerə yazmadım, ürəyimə, qanla nəqş etdim:”Mən Dövlətzadə Cəbrayıl
Dövlət oğlu, Azərbaycan ordusunun xüsusi təyinatlı çavuşu, xalqım, Vətənim, rəhbərim
və əqidəsinə vurulduğum general Polad Həşimovun məzarı önündə təntənəli surətdə
AND
İÇİRƏM!
Düşmənə
ən sarsıdıcı zərbə vurmayanacan, düşmənin ən azı on əsgər və zabitini məhv etməyənəcən,
general Polad Həşimovun qisasını almayanacan geri addım atmayacam! Əgər andıma
dönük çüxsam, qoy dostlarımla içdiyim sədaqət andı, Vətən qarşısında içdiyim əsgər
andı, bir də anamın südü mənə haram olsun!
Düşmənə
ölüm! Yaşasın müzəffər Azərbaycan əsgəri! Yaşasın Ali baş Komandan!
Qana
qan! Ölümə ölüm!”
EPİLOQ
MƏZARDAN
QALXAN NİDA
(General
Polad Həşimiovun məzarda monoloqu)
Günəş
bizsiz doğursa, qəm etməyin, şəhid qardaşlarım. Bu o demək deyil ki, günəş bizi
görmədi – gördü, sadəcə həmişəki kimi gülümsəyə bilmədi. Onun sarı-sarı kədəri
qanlı alnımızdan öpdü, yaralı sinəmizi sığalladı, açıq gözlərimizi sığadı.
Hamısı yaxşı idi, fəqət gözümüzü sığamasını istəmirdim – baxmaq istəyirdim Vətənimə.
Görüm mənnən sonra ordumuz qisasımızı aldımı? Günəşsə, şüa barmaqları ilə
gözümüzü el adətincə sığadı...
Biz
el adətincə ölmədik ki, el adətincə dəfn edəsiniz. Gözüaçıq dəfn edin bizi.
Gözümüz arxada qalıb axı! Qarabağımız düşməndə, Tovuzumuz güllə altında... Nə
el adəti... Ohhhh... Yaralarım sızladı... Yox, güllə yarası ağrıtmaz məni, ağrı
işimin yarımçıq qalmasınnandır. Mən Qarabağda vurmağı, sonra vurulmağı arzu
etmişdim axı... Qismət olmadı... Gözüm görmür daha, ay Günəş, mən sənə nə
deyim? Vaxtsız ölənin gözünü vaxtsız sığayarlarmı?!.
Gözümüz
görməsə də, qulağımız eşidir – mən bizim topların səsini ayırd edə bilirəm axı.
“Bum!” – bax bu düşmən topudur. Tovuzda Əziz kişinin evinə düşdü, qanına qəltan
etdi onu. Hə, hə, nə durmusunuz?! Nə əmr?! Vurun! Mən sizə əmr edirəm!!! Vurun
düşməni!!!
“Bom!”
“Bom!” “Bom!”
Afərin
uşaqlar! Dəqiq atırsınız. Amma sizdən bir xahişim var: mülkü əhali olan yerə
atmayın... Hə, bu, həm də əmrdir! Düşmən postuna, atəş! Atəş! Atəş!
Yaxşı,
qışqırdım, yaram qan verdi.
Mən
getməliyəm... Babalarımız demiş: gedən cismimdir. Ruhumu və bu yaralı ürəyimi
sizə vermişəm...
Ayıq-sayıq
olun!..
Eşidirsiniz səsini, ən gənc şəhidimizin yarasınnan qan açıldı, məni
çağırır. O zarıyan isə 6 aylıq körpəsinin səsi qulaqlarında qalan, şad ola bilməyən Elşaddır. Hər körpə səsi eşidəndə bağırır, bədənindəki
qəlpələr təzədən partlayır, qan aparır onu... Burda da işim çoxdur. Getməliyəm...
Yenə
deyirəm: ayıq-sayıq olun!
Gözünüzü
dörd açın...
Bu
gün bütün Azərbaycan torpağı səngər olmalı!
Hamı
səngərə!
ƏN
SONDA
Bu
yazı saytlarda dərc olunannan bir neçə ay sonra
ölkədə Vətən müharibəsi başladı. 44 gün çəkən bu haqq savaşında igid oğullarımız düşməni məğlub edib,
torpaqlarımızı azad etdilər. Ölkə
prezidentinin sərəncamı ilə Polad Həşimova Milli Qəhrəman adı verildi. Polad
paşanın başladığı bu dava Azərbaycanın qələbəsi ilə başa çatdı.
Yorumlar
Yorum Gönder