AZAD QARADƏRƏLİ ŞEKSPİR MƏNİM TALEYİMDƏ avtobioqeafik esse
AZAD QARADƏRƏLİ
ŞEKSPİR MƏNİM TALEYİMDƏ
(“Məndən
sonra” memuar romandan parça)
“Sekspir dövlət qulluqçüsu olub?” adlı bu yazı
“Burda kişi var?” (Bakı, Zero, 2013) hekayələr kitabıma ön söz şəklində
yazılmışdı. Sonralar üç cildlik “Renessans həsrəti”nin birinci cildində də çap
olundu. Yerinə rahat oturduğu üçün bəzi əlavələrimlə bu kitaba da salası oldum.
(Müəllif)
(Avtobioqrafik
esse)
Qələmim
təzə-təzə bərkiyirdi. Yəni hekayələrim və məqalələrim respublika mətbuatında
artıq rahat çap olunurdu.
Amma məni
yandıran o idi ki, rayonumuzda çıxan qəzet mənim yazılarımı çap etməkdən imtina
edirdi. Bu da məni əməlli-başlı püsdən-təvərədən çıxardırdı.
Belə bir vaxtda dostum Eldar Baxış şair Əhəd
Muxtarla bizə gəldilər.
Belə
qonaqlar mənim üçün əsl bayram idi. Bu ucqar rayonun ucqar kəndində dərdləşməyə,
yazını oxuyub fikir mübadiləsi etməyə bir kimsə yox idi. Bu iki şair dostla
yaxşıca yeyib-içdik, həm də zəhlələrini tökdüm. Gah hekayə oxudum, gah nə bilim
suallar verdim və həkaza. Səhəri isə rayon mərkəzinə getdik – tədbir varmış.
Tədbirdə
mən də oldum, nəydi, indi unutmuşam. Unutmadığım isə rayondakı yerli qəzetin
redaktor müavini Şükür müəllimlə görüşməyimiz
oldu. Eldar özünəməxsus sərt bir tərzdə “Ay Şükür müəllim, bizim dostumuz bu rayonun
yeganə yazıçısıdır, nə təhər olur, Bakı onu qəbul edir, amma sizin bu qəzet görməməzliyə vurur?”
deyib cavab gözlədi. Şükür müəllim zəndlə mənə baxır və nəsə fikirləşirdi. (Hə, bu adam rayon icraiyyə komitəsinin sədrinin – ispalkom Hürü xanımın əri idi və
rayon qəzetində hamını, hətta arvadının
başçılıq etdiyi sahələri belə tənqid etməkdən çəkinmirdi. Onu da deyirdilər ki,
ixtisasca fransız dili müəllimi olsa da, rus, ingilis dillərini də bilirmiş. Hələ
onu da bir az sonra öyrənəcəm ki, atası Müsavat hökümətinə rəğbət bəslədiyinə
görə repressiya olunub və sair.) Kişi saatına baxıb “Vaxtdır, gedək
Mehdiqulunun kababxanasına, görək
başımıza nə iş gəlir” deyib ayağa qalxdı.
Kababxanada mən o kişini əməllicə kəşf elədim – bu rayonda mənim adamsızlıqdan
boğulmağımın qarşısını alsa-alsa
bu Şükür müəllim alacaqdı. Yemək əsnasında o mənə təkcə bunu dedi: “ Cavan
oğlan, sən yazılarını mənim yanıma gətirəcəksən, yaxud poçtla göndərəcəksən.
Hansı mövzuda olur-olsun.”
Rayon qəzetinin qarşımdakı beton
hasarları o gündən uçub-dağıldı və yazılarım dalbadal çap olunmağa başladı.
***
Bir
qış gesəsinin səhəri anam tövlədəki heyvanlara ot atıb içəri girdi və əllərini
sobada qızdıra-qızdıra dedi:
.-
Qonşumuz Z... kişinin kərə qoçu bu gecə
murdar olub... arvad yazığı başdan çıxartdı, yaşının o vaxtında murdar olan
heyvanı soydu, ata yükləyib bu
qar-boranda getdi Mincivan bazarına.
O
gün mən “Qoyun əti” adlı hekayəmi yazdım
və poçtla Şükür müəllimə göndərdim. Hekayə çıxan günün axşamı SSRİ-nin məşhur “kekebe”
şefi Andropov hakimiyyətə gəldi və
gələn kimi də sərt qərarlar çıxartmağa
başladı. Yadımdadır, “SSRİ-nin 70 ili” adlı çıxışında o milli, dini
ayrı-seçkiliyin təbliğini kəskin tənqid edir, işə beş-on dəqiqə yubananları işdən
qovmağa çağırır və bir növ
uçub-dağılmaqda olan SSRİ-nin təmir-bərpa
işlərini görməyə çalışırdı. Və elə həmin qarlı-boranlı günlərdə işlədiyim məktəbin direktoru qorxa-qorxa dedi ki, səni raykoma çağırıblar.
Mən
hara, raykom hara? Axı heç partiyanın da üzvü deyiləm? Nəysə, kolxozun yük
maşınında getdim rayona. Raykomda dedilər ki, 3-cü katibin qəbuluna gedəcəksən.
Təbliğat-təşviqat şöbəsinin tez-tez danışan və nə dediyini heç vaxt başa düşmədiyim
müdiri məni 3-cü katibin qəbuluna
apardı. Katıb yerli qəzetin son nömrəsini stolun üstünə sərmişdi və gözucu gördüm ki,
onun qırmızı qələmlə sətirlərinin
altından xətt çəkdiyi mənim “Qoyun əti”
hekayəmdir. (Sonralar həmin hekayəni kitablarıma “Qoç əti” adıyla
salmışam)
Katib üzünü mənə tutub Andropov
yoldaşın daxili siyasətimizdəki
boşluqlar haqda kəlamlarından misallar gətirir, səsi özünə xoş gəlirmiş kimi əsir-coşurdu.
O elə bil iki nəfərçün deyil, yüz nəfərlik zal üçün danışırdı. Və birdən
stolunun üstünə sərdiyi qəzetə sarı əyildi, qırmızıladığı hekayəni göstərib dedi:
- 37-ci
il olsaydı, səni birbaş Sibirə göndərərdilər. İndi Sibir yoxdur, amma yoldaş
Andropov...
Dalısı
yadımda deyil. Bir o yadımdadır ki, katibin qara şəvə kimi saçları hərdən onun
burnunun üstünə tökülürdü və o saçlarını əllərilə geri verməzdən qabaq “fu” eləyib burnunun üstünə tökülən tellərini qovmağa
çalışırdı. Və məni gülmək tuturdu yavaş-yavaş. Katib isə deyirdi: “...yoldaş Andropovun
çıxışında milli-dini ayrı-seçkiliyə qarşı........ sənin bu hekayəndə isə gör nə
yazılıb?!”
O yenə
burnunun üstünə düşən saçına bir “fu”
deyib altından xətt çəkdiyi cümləni oxumağa başladı” “Ruslar, ermənilər heyvanı
qibləyə kəsmirlər ki... baltaynan
vururlar, ya da bıçağı soxurlar qoltuğuna.” Sənin deməyindən belə çıxır ki,
ruslar, ermənilər murdardılar?.. Sən nəyə gülürsən?! Bax, de görüm nəyə gülürsən?!
Səni bilirsən neyləyərəm? Sənin məsələni büroya çıxardaram, səni partiyadan
xaric edərəm... Dayan, sən axı nəyə gülürsən?!”
Mən
doğrudan da özümü saxlaya bilməyib gülə gülə
dedim:
-Mən partiyanın
üzvü deyiləm axı...
-Nə olsun
üzvü deyilsən... Mən zato səni partiyadan xaric etdirərəəəə!..
Mən pillələri
düşəndə dalımca tez-tez danışan şöbə müdiri nəsə dedi, amma bu dəfə aydın dedi:
-Ə, sən
düz yazmısan, qozuna da alma...
Şükür müəllimi
axtarmağa gedəndə yolda “Əmiş” çağırdığımız Əmrah müəllimi gördüm. İstədim
salam verəm, yazıq əyilə-əyilə özünü
daldaya verib hara isə yox oldu. Yadıma Andropovun “praqula görə işdən qovmaq
lazımdır” sözü düşdü və
“Əmiş”in dalınca baxıb yenə gülməyə başladım.
***
-Səni
vəzifəyə-zada qoysalar, qorxma get. Bilirsən, yazıçı gərək hər yerdən, hər şeydən
xəbərdar olsun. İndi sən o 3-cü katibin yanında olmasaydın, bunları hardan biləcəkdin?
Onun o “püff” eləməyini isə yaman tutmusan...
Əslində o saçlarına hirslənirmiş ki, niyə sözünə baxmır...
Bunları
Sabir Əhmədov gülümsəyərək deyir və yeni hekayəmi (“Aprel havası” adlanırdı və kəndli
ər-arvadın məhəbbətindən bəhs edirdi) oxuyub bəyənir, növbəti nömrədə
çap olunacağını söyləyir. Uça-uça Nəşriyyatdakı
pillələri düşürəm, lift-zad ağlıma da gəlmir. Hələ Eldar Baxışı, İsa İsmayılzadəni, Camal Yusifzadəni də görməliyəm, onlarla bir
yüz-yüz vuracağıq da. Ən axırda Tofiq Qəhrəmanovgilə getməliyəm. Bu gözəl
yazıçının gözləri tutulub axı. Gözü görməsə
də çoxlarından işıqlı adam idi Tofiq.
***
Məni məktəb
direktoru qoyublar. Hələ üstəlik
partiyaya da keçiriblər. Elə bu arada xəbər gəldi ki, ilk hekayələr kitabım
“Dumduru su” artıq çap olunub və satışdadır. (İndi fantastik görünə bilən
tirajla çıxmışdı: altı min!)
1988-ci
ildir. Rayona təzə birinci katib gəlib. Kitabımı mağazada görüb və məni raykoma
işə çağırdı. “Gedim, getməyim” edirdim ki, iki kəlmə söz yadıma düşdü. Biri əlbəttə
ki, ustadım Sabir Əhmədovun sözü idi, yuxarıda yazmışam. O birini isə mənə
institutda dərs demiş İsmayıl Şıxlıdan eşitmişdim: “Şekspir saray həyatını gözəl
bilib. Kralların, kraliçaların obrazını ustalıqla yaradıb. Əgər o deyildiyi
kimi aktyor, yaxud teatrda atsaxlayan olsaydı, bunları hardan bilərdi? Bir
versiya da var ki, ya Şekspir sarayda hansısa vəzifədə işləyib, ya da o əyan-əşrəfin
nümayəndəsi olub.” Bu fikri sonralar özüm də oxudum və ingilislər hələ də bu
fikirdədirlər ki, Şekspirin qəbrində hansısa sirli kitab var və haçansa o qəbir
açılacaq və bilinəcək ki, Şekspir əslində bizim tanıdığımız Şekspir deyilmiş...
O hansısa saray məmurunun oğluymuş, sadəcə adını gizlətmək üçün Şekspir
imzasından istifadə edib. Bəli, o vaxt yazıçıya həqarətlə baxırdılar, hər axşam onun yazdığı tamaşalara baxıb əl
çalmağa, ağlamağa, hırıldamağa görə teatra qaçsalar belə...
-Şekspir,
indiki dillə desək, dövlət qulluqçusu olub... Bunun o yanı, bu yanı yoxdur...
Canım, ola bilməz e, günü sarayda keçməyən adam “Hamlet”i, “Kral Lir”i yaza
bilməz?!
Bunları Şükür müəllim deyir və zəndlə
üzümə baxır…
Mən bir
li raykomda işlədim, sonra buranın adamı olmadığımı başa düşüb keçirdilər rayon qəzetinə redaktor müavini. (Həəəə,
Şükür müəllim rəhmətə gedib. Mən indi onun yerində işləyirəm.)
Və
respublikadakı təlatümlər. Xalq hərəkatı. Təbii ki, mən heç nəyə baxmadan xalqın tərəfindəyəm. Yazılarımda da bunlar
açıq-aydın hiss olunur. Bu ağır günlərdə
20 Yanvar baş verir və mən partiyadan çıxıram. İşdə mənim vəzifəmi aşağı
salıblar. Əslində bu, mədəni surətdə “get” deməkdir və bir az sonra mən gedirəm:
məktəbə, müəllimliyimə...
***
Biz
müharibəni uduzuruq. Qaçqınlıq, məcburi köçkün həyatı. Bakıdayıq artıq. Ailəni
dolandırmaq üçün hər işin qulpundan yapışıram. Dostlar sağ olsun. Düz dörd yerdə
işləyirəm. Bir neçə il sonra borc-xərcə bir otaqlı həyət evi alıram və yanından birini də tikirəm.
Bu arada yorğunluğumu gecələr hekayə
yazmaqla çıxardıram. Hekayələrim ilhamla yazılmır, o qədər də uğurlu deyil. Təkcə
ağrı bəs eləmir axı... Amma yazıram. Bu dövrün yazısını mən yazmalıyam. Öz
yazımı tapana qədər.
***
O
biri işləri atmışam daha. Təkcə Eldarın yanında, radioda qalmışam. Uşaq
verilişi hazırlayıram. Elə bil mənə qarğayıblar – Eldar da vəfat edir. Dalınca
da İsa İsmayılzadə...
Mən isə
yazıram. Yeni hekayələrimdən razıyam nisbətən. Deyəsən, istədiyim alınıb. Rafiq
Tağıyla tanış olmuşuq. Bir müddət sonra aramıza girən olur və küsüşürük. Təxminən
beş il sonra barışacağıq. Gənclərə məni oxumağı məsləhət biləcək Rafiq. Azadlıq
Radiosunun hekayə müsabiqəsində hekayəmi 2-ci edəcək və biz digər
dostlarımızla birgə “Yazı” dərgisini buraxmağı planlaşdıracağıq.
Rafiqi qətlə yetiriblər. Dərgi
çıxıb, amma Rafiqsiz.
Ədəbiyyatımızda
canlanma var. Mənim ilk romanımın da daxil olduğu “Burda yer fırlanmırdı” kitabım çap olunub. Geniş, təntənəli təqdimat olur və sair...
Bu arada
məni dövlət qulluğuna dəvət edirlər.
“Gedim, getməyim”dəykən yadıma Şekspir düşür, Sabir Əhmədov düşür, İsmayıl
Şıxlı düşür və Şükür müəllim düşür...
Komitə
Hökümət evindədi və bu binanın içində gəzişmək, oradakı sirlərdən agah olmaq nəyə
desən dəyər. Daha bir cəlbedici məsələ:
5 il sonra mənim təqaüd yaşım olacaq və allah qoymasa, yarıda bilsəm, mən
dövlət qulluqçusu kimi pensiyaya çıxsam, 300-400 arası təqaüd ala biəcəyəm!
Razılaşıram və 14 illik radio işimə son qoyub Ailə, Qadın və Uşaq
Problemləri üzrə Dövlət Komitəsinə baş məsləhətçi
gedirəm. Getməmişdən şərtimi kəsirəm: bax, mən yazıçıyam, sabah hekayələrim, məqalələrim,
kitablarım çıxacaq, məndən müsahibə alacaqlar... Razılaşırlar.
Təxminən
4-5 ay sonra sifarişlər gəlir ki, yazmağı dayandır, yaxud yaz, amma çapa vermə.
Bir həftə dözürəm. Amma indicə başıma bir mövzu girib, gic edib məni, siqareti
də tərgitmişəm, yazmasam, ürəyim partlayar axı. Otaqda ara qızışıb, məssəb itib. Nə barədə isə
müzakirə edirlər iş yoldaşlarım. Mən isə bu hay-həşirdə əyləşib hekayə yazıram. Axşam üstü hekayə hazır olur...
Hansısa saytdan zəng edib AYB-nin qurultayı barədə soruşurlar və az qala
söyüşlə cavab verirəm: mən ömrü boyu üzvü olmadığım bu təşkilat haqqında axı nə
deyim? Səhər eşidirəm ki, sözümü bəzəyib qəşəng bir anti-AYB müsahibə ediblər.
Narazılıq gəlir. Sonra müsabiqələr olur və mən hər ikisində (AYB və MKM-də)
onluğa düşürəm... Sonra AYB-ın müsabiqəsindən çıxıram və qəzetlər, saytlar,
televiziyalar məndən yazır... Narazılıq gəlir... Sonra nələr, nələr və iki
hekayə: “Fəlsəfə asfaltın üstünə yıxılmışdı”, “Eteri”...
Daha
narazılıq-zad gəlmir. Sadəcə çağırıb deyirlər ki, ərizəni yaz və get...
Bir az
müqavimət göstərsəm də, əhəmiyyətsiz iş bilib, yazıram ərizəni və gedirəm...
Həmişə
bu divarlar arasında üşüyürdüm. Düzdür, məndə revmatizm var, amma bu üşümək o
üşüməkdən deyildi.
Bayıra
çıxan kimi ilıq payız günəşi canımı qızdırır. Və düşünürəm: bu bir il iki ayda
mən burdan nə götürdüm? Neçə-neçə hekayə yazmışam burda, bir romanı bitirmişəm,
birinin də mövzusu başımdadır. Bitirdiyim romana ad tapa bilmirdim. Bu
yaxınlarda Mirmehdi deyilən gənc bir yazarın məqaləsindən tapdım romanın adını.
Elə belə də qoydum adını: “Cülyettanın
sağ döşünə toxunmaq”
Gedəndə
Hökümət evinin möhtəşəm divarlarına baxıb
düşünürəm: “Görəsən Şekspir
doğrudanmı dövlət qulluqçusu olmuşdu?”
***
Yuxarıda
Şükür müəllim haqqında söz açdım...
Bu
adam mənim Zəngilanda gördüyüm ən elitar adam idi. Xüsusi geyim tərzi, xüsusi
duruşu, yerişi və danışığı olan bu kişi bir gimnaziya timsalı idi. Yanında
otur, eşitdiklərin, gördüklərin bəsin olsun ki, gələcəyini qura biləsən...
“Kənd
həyatı” rayon qəzetində çıxan yazılarım haqqında tək bir söz demişdi:”Fərqli
üslubun var. Əsas odu ki, gözə kül üfürmürsən. Bağırmırsan. Sakitcə sözünü
deyirsən. Özü də düz sözü...”
O
özü də düz sözün bazı idi.
Rəhmətə
getməyini Ağdamda eşitdim. Axşam məktəbi direktorlarının (mən işlədiyim məktəbdə
həm də axşam məktəbinin qeyri-rəsmi direktoru sayılırdım) Ağdamdakı respublika
müşavirəsində o məşum xəbəri Zəngilan axşam məktəblərinin rəhbəri Heydərqulu Kərimov
verdi bizə. Müşavirədə çıxışımı necə başa vurduğumu bilmədim. Rayona qayıdanda
yol yoldaşlarım deyib-güləndə mənim könlümdən qara qanlar axırdı. Belə gözəl
bir dost itirmişdim!..
Elə
həmin günlərdə Şükür müəllimin xatirəsinə bir şeir həsr etdim. Təəssüf ki, o
şeirdən yalnız bircə bənd qalıb hafizəmdə:
...Ürəyimin
qanın udub yemişəm,
Yaxşı
adam, sənə allah demişəm,
Palıd,
vələs, ya da elə yemişən,
Min
il keçə quruyacaq, canım hey!!!
***
ŞEKSPİR VƏ LƏYAQƏT
Yazıçılıq
elə peşədir ki, bəzən ətrafında nələrin baş verdiyini unudur, yazdığın əsərin
zamanına daxil olur, ətraf aləmlə əlaqəni itirirsən. Mən, xüsusilə,
romanlarımın üzərində işləyərkən bu hallara düşmüşəm dəfələrlə...
Zira
nəyi itirirsən itir, tək bir şeyi daim özündə hifz etməlisən – LƏYAQƏTİ!
Sevdiyim
şair və daramaturq olan Şekspir də ləyaqətə qarşı laqeyd olmayıb. O boyda əsərlərin altına çiyin verən kişi ləyaqətsiz çətin
ki, bunların öhtəsindən gələ biləydi...
Şekspir
təkcə daramaturq kimi deyil, bir şair kimi də sonetləri ilə qəlbimə yol tapıb.
Bir soneti var ki, ta tələbəlik illərindən mənimlə gəzib bu dünyanı. Hara
getmişəsə, dilimin ucunda olub, lap Füzuli qəzəlləri kimi!..
Sözügedən
sonetin ilk bəndi elə gözəlim ləyaqət haqqındadır:
Mən
ölüm istəyirəm. Yoxdur görməyə taqət,
Dilənçilik
eyləyir qapılarda ləyaqət,
Sadəliyə
gülərək rişxənd eyləyir yalan,
Puçluq
paltar geyinir min bəzəkdən, cəlaldan.
Sonetin
digər misralarına endikcə sanki Şekspir müasirimizə çevrilir. Onun ağzından od tökülən
şair obrazı indi meydan sulayan saxtalığa, qüdrətsizliyə, axmaqlığa qarşı üsyan
edir, bədii sözün gücü ilə düzlüyü, mərdliyi, doğruluğu qorumağa çalışır:
Saxtalıq
hökm verir qəlbə, ağla, kamala,
Bəkarər
təhqir olub, düşür dərdə, zavala,
Qüdrət
qüdrətsisliyə əsirdir, səcdə qılır,
Düzlük,
mərdlik, doğruluq bir axmaqlıq sayılır...
Rəzalət
içində olanlar şərəf-şana nail olub (adamın yadına şərəf yoxsullarına verilən şərəf
ordeni düşür), pak adamlar qüsurlu, nöqsanlıların qapısında xidmətçidir, kütlük
500 il qabaq da özünü peyqəmbər sanırmış – lap indikilər kimi... ilhamın ağzı
isə...
Vallah
sizi bilmirəm, bu şeiri hər dəfə oxuyanda mənim Şekspirə rəğbətim daha da
artıb. Adam adam kimi adammış, şair kimi şair, daramaturq kimi dramaturq... və
ləyaqətli insan...
Hə
növbəti bənd:
Rəzalətlər
yetişir, şərəf, şöhrət və şana,
Paklıq
xidmət eyləyir hər qüsura, nöqsana.
Kütlük
çəkib özünü müdrik peyqəmbər sanır,
Əfsus,
ilhamın ağzı yumruqlarla tıxanır...
Bəli,
bütün bunların birbaşa yazıçıya dəxli var! Çünki bu rəzalərlər bir yumruğa
dönüb ilhamının ağzını tıxayır...
Ədəbiyyatın,
sözün böyüklüyü və ölməzliyi məhz bundadır. Nəyi sındırsalar da, onun müqaviməti
ilə gec-tez üzləşəcəklər. Nəyin imtahanından qurtarsalar da, ədəbiyyatın
amansız imtahanı onları saxta peyqəmbərlik taxtından endirəcək...
Məlumdur
ki, sonetlərin sonluğu iki misradan ibarət olur. Burda da son iki misra şairin
həsbi-halı ilə bitir:
Hər
tərəfdə rəzalət baş qaldırır, yüksəlir,
Lakin
səni atmağa, əziz dost, heyfim gəlir...
...Hə,
qayıdaq yazının əvvəlinə. “Şekspir dövlət qulluqşusu olumbu?” sualına...
Bəli,
olub. Ya da elə saray əyanlarından birinin oğlu olub. Sarayı bilib, görüb,
yazıb...
O,
sarayı təkcə yazmayıb. Şumlayıb. Kralından kraliçasınacan, hesoqunacan, saray əyanlarınacan,
hamısının payını verib. Təkcə elə bu sonetdə onun döymədiyi qapı qalmayıb...
Bəli,
yazıçı bütün bağlı qapıları döyməlidir. Aça bilməsə də, döyməli, haray
salmalıdır. Çünki bütün cinayətlər o bağlı qapılar arxasında baş verir...
“İnsanlar
dünyaya yaxşı bir şey vermədikləri üçün unudulmaqdan,
Və
yaşamağı bilmədikləri üçün ölməkdən qorxurlar...” – Şekspirin sözləridir...
Ölməkdən
qorxmayın. Sizi yaxşı mənada xatırladacaq bir kiçicik iziniz varsa,
qorxmayın...
S.A.
(Söz Ardı)
Bu
soyuq fevral günlərində aktyor dostum Kərəm Hadızadə məni Gənc tamaşaçılar
teatrına “Romeo və Cülyetta”nın yeni quruluşda tamaşasına dəvət etmişdi.
Tamaşaçılar, əsasən, gənclər və yeniyetmələr idi. Amma səhnəyə o qədər diqqət kəsilmişdilər
ki!.. Elə bil ağıllı telefon, yaxud kompüter arxasından qalxıb gələn gənclər
deyildilər... Şekspir onları uzaq Veronadakı talesiz gənclərin həyatına elə bənd
etmişdi ki...
...Tamaşanı
izləyə-izləyə öz qəhrəmanlarımla da təmasda idim. Hə, bilənlər bilir. Axı mənim
“Cülyettanın sağ döşünə toxunmaq” adlı romanım var. İllər əvvəl “Yazı”da hissə-hissə
çıxsa da, hələ kitablaşmayıb...
Hə...
Mənim Şekspirli taleyim belə olub...
Ruhun
şad olsun, ustad!
2013-2023
Yorumlar
Yorum Gönder