AZAD QARADƏRƏLİ KÖNÜL DƏFTƏRİ (“Məndən sonra” memuar romandan)
AZAD QARADƏRƏLİ
KÖNÜL DƏFTƏRİ
(“Məndən sonra” memuar romandan)
Radioda
işləyəndə Bakının və respublikanın rayonlarındakı məktəblərdə olur, uşaq
verilişləri hazırlayardım. Belə məktəblərdən biri də paytaxtın Pirşağa qəsəbəsinə
yaxın ərazində yerləşən, sakinləri əsasən Qərbi Azərbaycan camaatı olan adsız
bir kəndin məktəbi idi. 188 saylı bu məktəb həm də axarlı-baxarlı bir yerdə,
yaşıllıqlar içərisində yerləşirdi. Məktəbdə rastlaşdığım bir hal sonralar
aşağıdakı yazının yazılmasına (əslində sözügedən kitaba ön söz kimi qələmə
alınmışdı) və bir şeirlər kitabının mənim redaktorluğumla çapına səbəb oldu.
Onda anladım ki, həyatda olmayan adamın kitabını hazırlamaq kimi ağır bir yükün
altına çiyin vermək qədər çətin iş yoxmuş...
***
Yolum
188 saylı məktəbə düşmüşdü. Direktor Sabir müəllimlə dərsdən, təhsildən söhbət
edirdik ki, birdən o, stolunun üstündəki bir dəst yazılı vərəqləri mənə göstərib
dedi:
-Bunlar
bizim məktəbin ən gözəl müəllimlərindən olan Lətif Əliyevin şeirləridir. Çox istərdim,
baxasınız, bəlkə çap etmək mümkün oldu? Həyatı faciəylə dolu olan bu insan məktəbimizin
sevimlisi idi. Şeirləri də məncə layiqli olmalıdır – mən riyaziyyatçıyam, amma fəhmlə
başa düşürəm ki, onlarda nəsə var.
Vərəqləri
alıb ortadan bir şeiri oxudum. İlk bənd beləydi:
Dəli könül, nə yatmısan,
oyan, dur,
Deməsinlər bir çıraq da
sönür, hey.
Mürgüləyən duyğuları
oyandır,
Gedən bir də nə vaxt
geri dönür, hey?
Daha o
biriləri oxumağa ehtiyac yox idi. Bu mərhumun yazılarında dərin bir kədər
vardı. Direktor da “həyatı faciəylə dolu olan bu insan” demişdi. Dostum Sabir
müəllim onunçün ağır olsa da, məni bu mətləblərdən agah elədi.
“Məktəbimizin
dil-ədəbiyyat müəllimi Lətif Əliyevin ailəsinə ağır bir fəlakət üz verdi.
Onların 13 yaşlı oğulları dünyadan vaxtsız köçdü və bu, həm Lətif müəllimə, həm də onun həyat yoldaşına ağır zərbə
oldu. Bu səbəbdən onun yazdığı şeirlərin əksəriyyətində bir hüzn, kədər var.”
Sabir müəllimin bu sözləri məni sarsıtdı. Ömrü yarıda qırılmış bu ziyalının
şeirlərini vərəqləyə-vərəqləyə onun
könül dünyasına daxil oldum. Əvvəlcə, onun qısa tərcümeyi-halı ilə qısa
tanış olaq.
Əliyev Lətif Qənbər oğlu 1936-cı ildə Qərbi Azərbaycanın Dərəçiçək
mahalının Axta (Razdan) rayonunun Təkəlik
kəndində doğulub. Orta məktəbi doğma rayonlarında bitirdikdən sonra Bakıda Azərbaycan Pedaqoji İnstitutunun dil-ədəbiyyat
və tarix fakültəsinə daxil olub. Buranı əla qiymətlərlə başa vurub və
Saatlıdakı Əlisoltanlı kəndində müəllim işləyib. (Bir çox Qərbi Azərbaycanlılar
kimi onların da ailəsi 1948-ci ildə doğma od-ocaqlarından deportasiya
olunduqdan sonra Saatlıda məskunlaşmışdılar. )1968-ci ildə ailə həyatı qurub.
Bir il sonra ilk oğul övladı – hansı ki, vaxtsız ölümüylə onun gələcək həyatını
qaraldacaqdı – dünyaya göz açıb…”
Lətif
müəllim sevimli oğlunun ölümündən sonra ağır günlər keçirir. 1988-ci ildə uzun
sürən xəstəlikdən sonra vəfat edir. Üç övladı və sevgili xanımı başsız qalır.
Bir az sonra həyat yoldaşı da dünyadan köçür…
Bu
yarımçıq ömrün poeziya çilənmiş səhifələri var ki, siz mənim çapa hazırladığım
bu kitabda bunlarla tanış ola biləcəksiniz.
Lakin
hamısı bu deyil. Lətif müəllimin işıqlı siması hələ də bu məktəbin müəllimlərinin
və onun şagirdlərinin könlündə yaşayır. Mənim xahişimlə Sabir müəllim məktəbin
qocaman müəllimlərindən bir neçəsini dəvət etdi. Kimi qoltuğunda dəftər gətirmişdi,
kimi onunla çəkdirdikləri şəkillərlə gəlmişdi…
Əli Məmmədov:
-Lətif
müəllim mənim həm müəllimim olub, həm də onunla sonralar bir yerdə işləmişik.
Çox səmimi, çox təmiz bir insan idi. O, bizimlə söhbət eləyəndə adam yüngülləşirdi.
O kişi həm müəllim kimi, həm direktor kimi qənimət adam idi.
Rza
Quliyev:
-Mən
indi təqaüddəyəm. Amma bu məktəbdən özümü heç cür ayrı tuta bilmirəm. Axı bu dəhlizlərdə
Lətif müəllim kimi şəxsiyyətlərin ruhu dolaşır. Mən məktəbdə kimya gecəsi təşkil
eləmişdim. O, bütün gecənin ssenarisini nəzmlə yazmışdı. Allah ona böyük
istedad vermişdi. Həm də o son dərəcə zarafatcıl bir adam idi. Onun
zarafatlarının qabağında duruş gətirmək mümkün deyildi. Bir dəfə məni dilə
tutdu ki, gərək məktəbin partiya təşkilat katibi sən olasan. (katib o özü idi)
Vaxt gəldi, partiya iclası başladı. Raykomdan gələnlər də başda əyləşmişdilər.
Lətif müəllim əlindəki bir dəst vərəqə baxa-baxa hesabat verdi. O elə geniş təhlil apardı ki, qonaqlar
da heyran qaldı. İclasda məni zor-xoş partkom seçdilər. Hamı getdi, ikimiz
qaldıq. O, sənədləri mənə təhvil verəndə təkidlə məruzəni də istədim. Mənə beş
ağ vərəq verdi… O, bütün iclas boyu bu ağ vərəqlərə baxıb danışırmış… Gülməkdən
özümü saxlaya bilmədim.
Mübariz Bayramov:
-Biz
onunla əmioğlu idik. Məndən yaşca böyük olsa da, aramızda pərdə olsa da, o
böyüklüyünü hiss etdirməzdi. Tofiq Bayram, Məmməd Aslan, Rəfiq Zəka həmişə məktəbimizə
gəlib onun qonağı olardılar. Məktəbimizdə görkəmli şairlərlə görüşlər keçirərdi,
bizi də öz başına yığardı… Onun kökü, nəsli böyük soydan gəlir. Babası kəndin
koyxası olub, atası bənna idi. Həyat
yoldaşı Almaz müəllimə də ədəbiyyat müəlliməsi idi.
188
saylı məktəb Yanardağdan bir qədər aşağıda, adına Sovxoz dedikləri bir ərazidə
yerləşir. Əksəriyyəti Qərbi Azərbaycandan olan bu kənd sakinlərinin bir arzusu
var: kəndlərinə ya yeni ad qoyulsun, ya da elə Qərbi Azərbaycandakı qədim Təkəlik
kəndinin adı bura verilsin. Elə bilirəm ki, bu, Lətif müəllimin də ruhunu şad
edər.
İndi
isə sizi onun könül dünyasına səyahətə dəvət edirəm.
2012-ci
il.
***
Əziz
oxucu, Lətif müəllimin bir şeirini də bu xatirə yarpağına əlavə etdim ki, həm
onun söz dünyası ilə tanış olun, həm də həyatdan nakam getmiş bir müəllim-şairin
ruhu şad olsun.
ƏZİZİM
Neçə gündür
qulaqlarım səsdədi,
Dedim, bəlkə
qayıdarsan, gələrsən.
Könül səni
gör nə yaman istədi…
İşıq olub qəlb
evimə çilənsən,
Ölərəmmi, əzizim?
Qürbət nədir?
Yalqız qalan bir ürək!
Gəl bu
yolla etmə məni imtahan.
Bəxtim
yatsa, iki yerə bölünsək,
Söylə, sənsiz
bircə saat, bircə an
Gülərəmmi,
əzizim?
Şərik olduq
sevincə biz, qəmə biz,
Əllərimdən
qoparmadın əlini.
Yüz istəklə
birgə vurdu qəlbimiz,
Mən səninlə
bu dünyada ölümü
Bölərəmmi, əzizim?
***
S.A.(Söz
Ardı.)
Neçə
vaxtdır yolum o yanlara düşmür. Görəsən, o adsız kəndə ad qoydularmı? Bir yolum
düşsəydi, Lətif müəllimin məzarını ziyarət edər, deyərdim ki, indi dünyada yeni
gəlişmələr var. Bəlkə, bir gün Axtaya, Təkəliyə yol aldıq...
Yorumlar
Yorum Gönder