AZAD QARADƏRƏLİ ŞƏHİDLİK MƏRTƏBƏSİ (Tələbə yoldaşımız Sabir Əhmədovun xatirəsinə)
AZAD QARADƏRƏLİ
ŞƏHİDLİK MƏRTƏBƏSİ
(Tələbə
yoldaşımız, şəhid qardaşımız Sabir Əhmədovun xatirəsinə)
1972-76-cı
illərdə keçmiş V.İ.Lenin adına APİ-nin (indiki ADPU) dil-ədəbiyyat fakültəsinin
82-ci qrup tələbəsi olan bizlər qarşıda necə bir təlatümlü dövrün olacağını heç
ağlımıza da gətirməzdik. Sov.İKP tarixindən, elmi kommunizmdən, siyasi
iqtisaddan dərs deyən müəllimlərimizin at oynatdığı zamanlardan 20-25 il ötməmiş
SSRİ dağıldı və o qəddar müəllimlərin tarixi də, kommunizmi də künfəkün oldu.
Bizlər isə hərəmiz bir rayonda, yaxud Bakının hansısa məktəblərində müəllim işləyir,
balalarımıza dilimizi, ədəbiyyatımızı öyrədirdik.
Qrup yoldaşlarımızdan biri şamaxılı Sabir haqqında ayrıca danışmalıyam. Əhmədov Sabir Ağaqardaş oğlu 1954-cü ildə Şamaxının
Əngəxaran kəndində doğulmuşdu. Bir il yataqxanada bir otaqda qalmışdıq. Yaxşı
qarmon çalmağı vardı. Elə bu qarmon çalmağına görə aramızda bəzən inciklik
olardı. Mən dərslərimi oxuyanda Sabir qarmon çalardı. Mən bəzən gecələr dərs
oxuyanda, yaxud oturub hekayə yazanda işıqları yandırdığıma görə buna da o
etiraz edərdi. Bir-iki dəfə aramızda dadsız olay olsa da, sonradan barışmış, hətta
qucaqlaşıb ayrılmışdıq.
Sabir
vətənpərvər, ürəkli oğlan idi. Pambığa gedəndə bir dəfə üstümüzə hücum çəkən
yerli uşaqlarla vuruşmaqdan çəkinməmiş, onların qaçmasına səbəb olmuşdu. Daha
çox tələbə yoldaşlarımızdan Gəncəvi və Nəbi ilə oturub-durar, uca səslə danışar,
gülüşünün sədası uzaqdan eşidilərdi.
Sabirlə
yataqxanada qalanda gizlicə nə isə yazdığını görərdim. Artıq mənim hekayələrim
çap olunmağa başlamışdı və bunu o da bilirdi. Bir dəfə dedim ki, bilirəm, nəsə
yazırsan, amma tez də gizlədirsən. Niyə? Biz ədəbiyyat fakültəsində oxuyanların
hamısının bu və ya digər dərəcədə istedadı olur, yazdıqlarını mənə göstərə bilərsən.
İstəsən, səni tanıdığım redaksiyalara apara bilərəm. Çiynnini çəkib, “ala, yox
ala, eyibdi, mən yazmıram... sadəcə... qeydlərim var...” dedi. Amma hiss
edirdim ki, yazır, üzə çıxartmağa ürək eləmir.
Sabir
həm də sözü şax deyən uşaq idi. Heç kimdən çəkinməz, hətta müəllimlərlə də sözü
çəpləşərdi.
90-cı illərin qanlı-qadalı hadisələri Sabirdən
yan ötmədi. Nəbi danışır ki, xalq hərəkatı başlayan kimi onun aktiv
iştirakçılarından oldu. Müstəqilliyimiz bərpa ediləndən az sonra milli qüvvələrin
hakimiyyətə gəlişi hamı kimi Sabiri də sevindirdi. Hətta ona Binəqədi rayonunda
maarif şöbəsinin müdiri vəzifəsi təklif olunanda “Qarabağda erməni
daşnaklarının kökü kəsilməyincə mən heç bir vəzifə tutmaq istəmirəm” cavabını
vermişdi.
Könüllü cəbhəyə gedən bu gənc müəllim, az keçmədi
ki, Fizuli rayonunun Qacar kəndində gedən döyüşlər zamanı qəhrəmancasına həlak
oldu. Nəbi deyir ki, bir axşam televizora baxanda gördüm ki, Sabiri Şəhidlər
Xiyabanında dəfn edirlər. Necə qışqırdımsa, səsim batdı, neçə saat dilim
tutuldu.
Məzarı
Şəhidlər Xiyabanındadır. Ruhu şad, yeri qu tükü olsun!
Gəncəvi
danışırdı ki, Sabir şəhid olandan sonra Əngəxarana getdim. Ailəsində oldum,
oxuduğu məktəbə baş çəkdim. Şəhid Sabir Əhmədov adına Əngəxaran kənd məktəbinin
həyətində daşa dönmüş Sabir – dostumun büstü qarşıladı məni. Qəlbim fərəhlənsə
də, onun yoxluğu qəlbimi ağrıtdı.
Bəli,
82-ci qrup Vətən uğrunda döyüşlərdə öz şəhidini verdi.
Mən
isə doğma rayonum Zəngilandan, kəndim Qaradərədən qaçqın düşüb Bakıda məskunlaşanda
tələbə yoldaşlarımla Sabirin Şəhidlər Xiyabanındakı məzarını ziyarət etdim.
Nə
yazıq ki, mənim bir çox əlyazmalarım kimi şəkil albomlarım da işğal zonasında
qalmışdı. Ona görə Sabirin şəkilini bu yazı üçün tələbə yoldaşlarım Nəbi, Gəncəvi
və Qətibə Cahandarovadan istədim. Sağ olsunlar, bir çox şəkillərimizi göndərdilər,
baxıb duyğulandım. Sabirin buradakı şəkilini də onların göndərdiklərindən
seçmişəm. Yaraşıqlı, boy-buxunlu Sabir qardaşımız şəkilə döndü. Ailə qurmadığı
üçün övlad yadigarı da yoxdur... Bir təsəllimiz var: şəhid qardaşımızın
döyüşdüyü, qanını axıtdığı Qarabağ torpağı qəhrəman ordumuzun sayəsində düşmən əsarətindən
azad edilib.
Deyirlər,
şəhid ruhları qanlarını tökdükləri yerlərə daha çox üz tuturlar. Yəqin ki,
Sabirin də ruhu orada – azad Qarabağdadır. Yeni ünvanın – şəhidlik mərtəbən
qutlu olsun, qardaşım!
22.04.2023.
(“Məndən
sonra” memuar romandan)
Yorumlar
Yorum Gönder