AZAD QARADƏRƏLİ “GÖYLƏR YERƏ BAXANDA SƏMA PƏNCƏRƏSİNDƏN...”
AZAD QARADƏRƏLİ
“GÖYLƏR
YERƏ BAXANDA SƏMA PƏNCƏRƏSİNDƏN...”
(Kazım
Və Kazımoviçin bir düjün şeiri üzərinə asi-kifir düşüncələr)
Müşfiq
haqqında bir essem var : “Qırıldı bir zərif şüşə içində...” adlanır...
Mən
Müşfiqi o yazıda “sinif yoldaşım”, yaxud tələbə yoldaşım, yaxud “dərnək
yoldaşım” kimi xarakterizə etmişəm... Hə də, axı o qocalmadı... qocala bilmədi...
qocalmağa qoymadılar... elə həmişəbahar gülü kimi həmişəcavan qaldı... Lorka
kimi... Eldar Baxış kimi...
Mən
gənclərdən çox yazmışam. Özü də hamının qəbul etdiyi, əl üstündə gəzən, göz bəbəklərindən
deyil... hələ az adamın tanıdığı, tanımadığı, tanımaq istəmədiyi gənclərdən...
“Yazı”da
da belələrinin hələ maya tutmamış yazılarını verərdim. Amma bilirdim ki,
qırılmağa qoymasan, tez mayalanacaq, bərkiyəcək, pərvazlanacaq, uçacaq...
Hə...
Uçuşdu yazı. İllah da poeziya...
Bir
imza var. Əndrəbadidi. Heç şair imzası deyil. Yəni...
Kazım
və Kazımoviçi deyirəm. Şoxdandır təqib edirəm. Yox, bağışlayın, “təqib edirəm”
pis çıxdı, “güdürəm”. Yox yenə olmadı. İzləyirəm... Eh... Oxuyuram və özümçün kəşf
etməyə çalışıram. Məhz çalışıram. Ona görə ki, tez ələ gələn deyil. Balıq
sürüşkənliyi, elə balıq soyuqluğu var onun misralarında. Məsələn, belə:
Vaxt
var idi, əl təri yorulmaq simvoluydu:
vaxt
var idi, yox idi fəhlənin durmaq haqqı...
... Dalinin bığlarının vardı burulmaq haqqı?..
Hə
gərək bu sürüşkən qafiyələrin arasında gizlənən mənanı tapmaq üçün gənc
dostumuzun – inamla deyirəm, şairin araya doldurduğu misralara qayıdasan ki,
ağlın bir şey kəsə, yoxsa cici-bacı qafiyələrə öyrəşmiş ağlımız aza biər:
...Nəysə...
ruhu şad olsun ümid və gümanların,
Heç
çoxu yaşanmadı ötüb keçən anların,
Ey
bizim əsrimizin müasir klonları,
filimdəki
Jokerin qəmzələri necəydi?..
Deyəsən,
barmaqlarınız dinc durmur axı?! Çırtıq çalmaq istəyirsiniz? Pəh! İstəyirsiniz,
lap dünbəyinizə çalın, amma bu misralarda meyxananın özü yox, həngi var. Allah
bizim xalqa bir də mərsiyə oxumaq qismət eləməsin. Amin... Meyxana isə olar...
Döyüşə gedəndə, qələbə çalanda ilk ağıla gələn meyxana olur...
Amma
ki, Kazımın şeirlərini meyxana kimi qəbul edənlərlə sonacan davam var. Buna
baxın hələ:
Gülüzlümsən arı diyirlər mənə,
Güldən alır barı diyirlər mənə.
Qaşların gözün üstə əsa kimi,
Gözlərin Musa yaran dərya kimi,
Səni təsvir edirlər Leyla kimi,
Məcnunun oxşarı diyirlər mənə.
Köməyə gəlir mənə ilham pəriləri,
Şeir yazır sənə ilham pəriləri,
Pıçıldayır yenə ilham pəriləri;
- Gələr gecə yarı - diyirlər mənə...
(Və
bu son misrada bir Nizami ahı da duyulur: “Gecə xəlvətcə bizə sevgili yar gəlmiş
idi...”)
Yox,
bitmədi. Əslində bu şeir deyil, şeirin min illik ahıdır ki, Kazımın canından
zinə-zinə çıxır, bizim ruhumuza hopur və qayım-qədim bir ədəbiyyatın köhnə-yeni
övladını bizə təzədən tanıdır. Libası köhnə ola bilər, mənası kömköhnə, özü təzədi,
gözü – baxışı təzədi...
Bitmədi.
Türkün sözü, dalısına baxın; qandı, qan! Hərçənd sizə nar suyu kimi görünə bilər;
kim demiş sizə, nar təbiətin qanaması deyil?!
Yaşam - köhnə tasdı, Ölüm - müasir,
Yazım; qədimyanə, silim; müasir,
Məni tanımırsanmı, gülüm, müasir
şeirin memarı diyirlər mənə?!
Tutdum ürəyimdə arzu, ağladım,
Güli-rüxsarinə qarşu ağladım,
Gözümdən qanlı axdı su ağladım,
İndi Göyçay narı diyirlər mənə.
Yeni
gənc şairimizin məhz həmən şeirini bu yaxınlarda internetdən oxuyanda
bilirsiniz nə yazmışdım? Elə-belə, bədahətən, ilk ağlıma gələn cümlələr: “Yaxşıdı.
Ənənəvinin içindən sıyrılmış modern baxış var. Bu imzanı artıq neçənci dəfədir
özümçün kəşf kimi qeyd etmişəm.İnşallah bir düjün şeirlərı,yaxud kitabı çıxar, oxuyub
daha çox feyziyab olarıq. Uğurlar diləyirəm.”
Qocaman
müəllimimiz İmran Babayev (ruhu şad olsun, dərsində tək bircə dəfə şuluqluq
salmışdım, ağrısını illərdir çəkirəm) Nəsiminin bir qəzəlini Bakı ləhcəsi ilə
meyxana həngində
oxuyanda –
Həm sədəfəm, həm inciyim, həşrü sirat əsənciyəm,
Bunca qumaşü rəxt ilə mən bu dükanə sığmazam... -
-yerdən söz atmışdım: “Bəhr pozuldu axı, qəzəlin bəhri
o deyil!”
Qocaman
müəllimimiz dərhal ahəngi dəyişmiş, rəcəzin döyüş ahənginə salaraq növbəti
misraları söyləmişdi... Və mən bilirdim ki, bir gün Nəsimi yeni cilddə təcəlla
edəcək, yeni biçimdə, yeni formada doğacaq – doğdu da! Gəlin, eşidək Kazım Və
Kazımoviçdən Nəsimi səsini:
...Dilbəra !
Əğyara meylini salma gəl,
qalma gəl...
Dua et batmasın Titanik
Buz kimi su səpdim yollara
romantik-romantik
Toz olmaz, qorxma gəl;
Qonmadan budağa son bahar
sərçəsi...
Gəl danış... Ruhumu oxşasın
Naxçıvan ləhçəsi...
Dilbəra!
Rüzgara qoşul gəl
Uzun-incə bir yol gəl
Min dəfə tövbəni pozmuş
olursan ol, gəl
Nolursan ol, gəl...
Yüzəcən
essem çap olunub “Renessans həsrəti” adlı üç cildlik kitabımda, yarıdan çoxu gənclərdəndir.
Niyə? Ondan ki, mənim haqqımda düz otuz il şifahi danışıblar... Və indi
yazırlar... Onda lazım idi axı!..
Hə,
bir istedadlı gəncin yazıları haqqında yazdığım yazının adı “Onun yazı piramidası”
adlanır. Bu piramida ki var, axmaq şeydir. Mn illərdir sirrini, sehrini aça
bilmir elm. Elə sənət də belədir. Sehri də var, sirri də, sirpici də.. Ən
qoxulusu bilirsiniz nədir? O piramidanın sivri ucu! Allah göstərməsin! Ora
çıxdın, orda durmaq gərək! Ordan yumalanmaq da var, onun sivri ucuna taxılmaq
da... Allah qorusun...
“Kimsə
nəsimi sözünü fəhm edə bilməz...” –
deyib böyük ustad. Sanki Kazım Və Kazımoviçə deyib.
Vallah hə. Sanki 600 filan il sonra onun həngində şeirlər yazan adamı görüb, daha
sonra deyib:
“Bu
quş dilidir, anı Süleyman bilir ancaq”...
Kazımın
şeirində vəsf də var, amma o bizim tanıdığımız vəsf deyil. Özününküdür. 600 il
sonrakı vəsf. Elə o vəsflə də bu nataraz yazını bitirək:
...Nuru görsəndi yarın ox batanda gözünə,
Məşuqa qovuşmağın məqamı çatdı artıq.
Sanki toxunmaq üçün həqiqətin izinə,
Son elçinin öpdüyü yanaqlara ağladı.
Keçdi məzlumun ahı ərşin hər küçəsindən,
Göy yerə təslim oldu bulud bayrağı ilə.
Göylər yerə baxanda səma pəncərəsindən,
Cənnətin süd çayları bulaqlara ağladı.
Mən
bir müddət Kazımın “pəncərəsindən” baxdım və sizi də buna sözq etdim...
İnam
var içimdə: bu şairlə hələ çox yola çıxacağıq...
S.A.
(Söz Ardı.)
Sözarası
deyim ki, içimdə bir qorxu var: indinin gənc şairləri pilləsi bilinməyən
poeziya qəsrinin bir mərtəbəsini fəth edəndən sonra usanırlar, yorulurlar, hətta
forslanırlar və “bitdi” deyirlər. Halbuki min ildir bitməyən bir eşq gəzir o qəsrin
saraylarında... Hələ heç kimin aça bilmədiyi 40-cı otağı heç demirəm...
02.01.2024.
Yorumlar
Yorum Gönder