AZAD QARADƏRƏLİ AZ GÖRDÜYÜM, ÇOX İSTƏDİYİM BƏDİRXAN ƏHMƏDLİ (Alim dostumun 70 illik yubileyinə kiçik bir dost öygüsü)

 

 

                                AZAD QARADƏRƏLİ

                         AZ GÖRDÜYÜM, ÇOX İSTƏDİYİM BƏDİRXAN ƏHMƏDLİ

 

                        (Alim dostumun 70 illik yubileyinə kiçik bir dost öygüsü)

 

            Elm adamları ilə, xüsusən ədəbiyyat, fəlsəfə və dilçiliklə məşqul olanlarla, istər-istəməz yaxınlıq etmək, kəlmə kəsmək, uzun-uzadı mübahisə etmək, hətta məclis qurmaq kimi məziyyətlərimiz olub. Onların bir çoxu ilə yazışmışıq (vaxtilə belə bir ədəbi üsul vardı), bir çoxu ilə telefonla söhbətləşmişik, bir çoxu ilə üzbəüz görüşmüşük, lab nadirləri də olub ki, bu uzun həyatımız boyu iki-üç dəfə görüşmüşük.

            Sizə deyim ki, bu sonunculardan biri professor Bədirxan Əhmədlidir. Bədirxan bəylə ilk görüşümüzü dumanlı da olsa xatırlayıram. 30 ilin o başında bir dərgi ətrafında yığışmış, müstəqilliyimizin ilk illərinin sevincini, ağrı-acılarını götür-qoy edir, yazıb-pozurduq. Belə görüşlərin birində Bədirxan bəy də iştirak edirdi. Yaddaşımda sərrast danışan, yüz sözün birini seçib deyən, bir də diqqətcil adam kimi qaldı. Ondan sonra bir əlin barmaqları qədər görüşdük. Zira ən çox görüşdüyümüz məkan feysbuk deyilən meydan idi ki, bir-birimizdən xəbərsiz yazı-pozularımızı oxuyurduq.

            Son görüşlərimizin birində dostumuz Lətif Şüküroğlunun da iştirakı ilə xeyli dərdləşdik. Məlum oldu ki, professor qardaşımız nəinki mənim yazı-pozumdan xəbərdarmış, hətta “Əllidən bir kəm”in qəhrəmanlarına qədər tanıyırmış...

            Ən maraqlısı isə o oldu ki, bir dissertantının mənim yaradıcılığımdan mövzu götürdüyünü (yəqin ki, elmi rəhbərin təşviqi ilə olmuşdu), kitablarımı axtardığını bildirdi.

            Bu dissertant söhbəti bir bəhanə oldu. O gündən sonra dəfələrlə telefonda danışdıq. Lap sonda çapına başlanılan külliyyatımın 1-6-cı cildlərini iş yerinə göndərdim...

            Bədirxan bəyin Azərbaycan satirasından elmi işlər yazması, bu yaxınlarda isə Azərbaycan ədəbiyyat tarixinə aid üç cildlik kitabını nəşr etdirməsi mühüm hadisə sayılmalıdır. Ən böyük uğuru isə çoxlu sayda gənc elm adamının yoluna işıq tutması, tədqiqatlarını istiqamətləndirməsi olub.

            Bu günlərdə dostum professor Bədirxan Əhmədlinin 70 yaşı tamam olur. Əziz dostuma, qardaşıma can sağlığı və daha böyük elmi uğurlar arzulayıram!

 

                                                                                                                      20.04.2025