AZAD QARADƏRƏLİNİN ƏSƏRLƏRİNİN 11-Cİ CİLDİ ÇAPDAN ÇIXMIŞDIR

 

     

      AZAD QARADƏRƏLİNİN ƏSƏRLƏRİNİN 11-Cİ CİLDİ ÇAPDAN ÇIXMIŞDIR

 

 

         Yazıçı Azad Qaradərəlinin əsərlərinin 11-ci cildi çapdan çıxmışdır.

         Bu cildə müəllifin “Ucubuluq” romanı, “Demokratiya ağıları” silsilə hekayələri, “Özündən əmin bəy və Avropa gözəli Vanda xanım” uzun hekayəsi, habelə “Qarabağın ağca günləri” səfər qeydləri daxil edilmişdir.

         “Ucubuluq” romanı “Dədə Qorqud” motivləri əsasında yazılıb və əslində dastanın itmiş boylarından biri kimi müəllifin yaşadığı bölgədə – Zəngəzur mahalında, ora yaxın Qaradağda və Təbriz ətrafında hələ də dildə-ağızdadır. Müəllif romanda dastanın üslubunu, dilini qorumağa çalışmış, modern romançılıqla klassik dastançılıq ənənələrindən istifadə edərək yeni bir roman-dastan qələmə almışdır.

          “Demokratiya ağıları” silsiləsinə daxil olan hekayələr bəzi hallarda  fəhmlə, bəzən isə  müəllifin müşahidələri və tarixi sənədlərə əsaslanması ilə qələmə alınıb. Bu mətnlərdəki  hansısa fikirlər  kimlər üçünsə mübahisəli görünə bilər.  (Yazı prosesində, sənədlərə istinad edilsə də, bunlar bədii yazılardır və müəllif   qəhrəmanlarına  bəzən  öz ampluasından yanaşıb.) Amma sərt bir həqiqət var – tarix və onun amansızlığı. O insanlar ki, artıq tarixə qovuşmuşlar və özləri də tarixdirlər, onlardan  yazmaq həm çətin olur, həm də ağrılı... Elçibəy kimi...

            Silsiləyə daxil olan “Özündən əmuin bəy və Avropa gözəli Vanda xanım” uzun hekayəsində isə Şərqdə ilk cümhuriyyətin qurucusu M.Ə.Rəsulzadənin mühacirətdəki ömür yoluna işıq tutulmuş, ona bu yolda həm yol yoldaşı, həm də ömür-gün yoldaşı olmuş polyak qızı Vanda xanımın obrazı bədii detallarla verilmişdir.

            Habelə kitabda müəllifin ən qısa hekayələri, bir də işğaldan azad olunmuş torpaqlardan bəhs edən “Qarabağın ağca günləri” adlı yol qeydləri daxil edilmişdir

          Qanun nəşriyyatında işıq üzü görən yeni cildin elmi redaktoru və ön sözünün müəllifi filologiya elnləri doktoru, professor İsmayıl Kazımov, redaktoru Mübariz Örən, tərtibçisi Türkan Azadqızıdır.

            Kitabı yaxın günlərdə Milli Kitabxanadan (köhnə M.F.Axundov adına kitabxana), AMEA-nın, ADPU-nun (əski APİ), Folklor İnstitunun, Zəngilan rayonunun mərkəzi kitabxanalarından əldə edib oxumaq olar.