AZAD QARADƏRƏLİ MÖVZU VƏTƏNDİRSƏ... (Bir serial haqqında qeydlərim)
AZAD
QARADƏRƏLİ
MÖVZU
VƏTƏNDİRSƏ...
(Bir
serial haqqında qeydlərim)
Türkiyənin
Kanal D televiziyasında yayımlanan “Vatanım sensin” serialının bir neçə
seriyasını izləsəm də, işlərimin çoxluğu bu seriala diqqət ayırmağıma imkan
vermədi.
ARB
televiziyasının bu serialı bizim dildə səsləndirməsi və yaxın çevrəmdə olan vətənpərvər insanların
bu çoxseriyalı izləməyimi şiddətlə
tövsüyə etmələrinə baxmayaraq bir yazı-pozu adamı kimi yorğunluq və son
zamanlar məni üstələyən yaş problemi yenə
vaz keçməmə səbəb oldu. Amma...
Bir
gün təsadüfən serialın hansısa seriyasını sonacan izləyəndən sonra anladım ki,
serialın bəhs etdiyi dönəm - Türkiyənin ölüm-qalım zamanı və bu mühüm mərhələdən
bəhs edən bu “əsər” (bəli, mən bu serialı məhz bir əsər
hesab edirəm!), neçə seriya olur-olsun baxılmağa layiqdir. Elə buna görə də ARB
televiziyasının bu serialın dublyajını yarımçıq kəsib yerinə Xoşqədəmli-Zahurlu
şoular verməsi heç kefimə soğan doğranadı! Kanal D-nin arxivindən serialın
bütün hissələrini endirərək seyr etdim. Düzdür, bu “seyr etmə” mənim uzun
zamanımı aldı, zira bu zamana heç qızırğalanmadım. Bu serialı bir roman
oxuyurmuş kimi seyr etdim.
Kino
və seriallara aid bilgim çox məhdud olduğundan yaradıcı qrup, onların işi və
sair kimi məsələlərdən bəhs etməyəcəyəm, bunun öz bilgələri var. Mən isə sırf
bir tamaşaçı kimi danışıram burada. Ssenari uğurla yazılıb, serial da çox ustalıqla çəkilib, hər şey
yerli-yerindədir. Təkcə bəzi döyüş və agentura şəbəkəsinə dair səhnələrdəki bəsitliyi
nəzərə almasaq, hər şey bir mizana, ölçüyə tabe etdirilib.
Və...
Üstəlik,
mövzu Vətənsə...
(Və
bu Vətən bizə də doğma və hətta öz Vətənimiz qədər gərəklidirsə!..
Yadıma
Sovet dönəmindəki “Baharın 17 anı” serialı düşür və o serialı seyr etdiyim
zamanıma və o seriala xərclədiyim hiss və duyğularıma acıyıram. Baxmayaraq ki, o serialda həqiqətən
gözəl aktyor işi və əla səhnələr vardı, amma o serial bizə yad olan bir vətəndən
bəhs edirdi və bizi o “vətən”i sevməyə səsləyirdi... Əslində o “vətən” bizim öz
Vətənimizi işğal etmiş, müstəqilliyimizi məhv etmiş, suverenliyimizi
zorlamışdı...)
Məncə,
Az.Tv hökmən özünün yüksək səviyyəli dublyaj texnikası və heyətinin məharətinə
güvənərək bu serialı mütləq yayımlamalıdır. Torpaqlarının hələ də bir qismində
yağı ordusu gəzən, daim düşmən təhdidi altında yaşamaq və işləmək məcburiyyətində
qalan (bu gün də bir əsgərimiz Kəlbəcərdə düşmən snayperi ilə öldürülüb) biz Azərbaycan türkləri üçün, əslində elə Türkiyənin
ölüm-qalım savaşı verdiyi zamandır, yəni biz hələ də müstəqillik savaşındayıq.
Gəlin özümüzü aldatmayaq. Müstəqilliyimizin tarixi hələ 30 il çərçivəsindədirsə,
bunun belə olduğunu qəbul etməliyik. Baxmayaraq ki, müsəlman və türk Şərqində
ilk Cümhuriyyəti biz qurmuşuq, müstəqillik savaşımız bitməyib. Belə görünür ki,
hələ uzun zaman da davam edəcək. Ondan ki, ətrafımızda qəvi bir düşmən və ondan
da qəvi olan onun havadarları var...
Əzizlərim!
Mövzu Vətəndirsə, qalan bütün nəsnələr bihudədir...
12.01.2022
Yorumlar
Yorum Gönder