AZAD QARADƏRƏLİ ONUN QAFQAZLI BAXIŞI (Aktyor dostum Kərəm Hadızadənin 60 yaşına)

 

KƏRƏM HADIZADƏ – 60

 

                                   AZAD QARADƏRƏLİ

 

                                       ONUN QAFQAZLI BAXIŞI

 

                       (Aktyor dostum Kərəm Hadızadənin 60 yaşına)

 

 

 

            Onunla ilk dəfə yaşadığım Sabunçu qəsəbəsində rastlaşanda bir-birimizi sadəcə süzmüş və aralanıb getmişdik. Sonra bu rastlaşma təkrar olunanda hansımızsa ayaq saxladı (deyəsən, mən idim) və beləcə, əl tutuşub tanış olduq. Elə ilk təmasdaca öyrəndim ki, o da bu qədim qəsəbənin sakinişmiş. Sonra tez-tez rastalşdıq və söhbətimiz təkcə iki qonşunun deyil, bir yazıçı ilə aktyorun görüşünə çevrildi. Mən ona kitablarımı hədiyyə etdim, o isə məni aktyoru olduğu Gənc Tamaşaçılar Teatrının yaddaqalan tamaşalarına dəvət etdi...

            ...İkinci Qarabağ Müharibəsi qələbə ilə başa çatmış, ordumuz düşməni torpaqlarımızdan qovub çıxartmış, xalqımız qələbə sevincini böyük coşqu ilə qeyd edirdi. Belə bir gündə televiziya kanallarının birində təsirli bir veriliş verildi. Aktyor Kərəm Hadızadə heç bir qrim-filan etmədən gedib Qarabağda hansısa bir kənddə viran qalmış bir evin xarabalığında əyləşərək ürəkdən gələn bir səslə danışır, danışırdı. Əgər onu əvvəlcədən tanımasaydım, elə biləcəkdim ki, elə bu uçuq evin qaçıqın-köçkün sakinidir ki, öz dağıdılmış dudumanının xarabalığında ağı deyirmiş kimi ozalanırdı...

            Və elə o andaca telefonu qaldırıb zəng vurdum Kərəm bəyə, təbrik etdim sarsıdıcı, amma möhtəşəm verilişə görə. Ardınca soruşdum ki, ay Kərəm, qardaşım, heç indiyənəcən səndən soruşmamışam, doğrudan e, sən haralısan, birdən qarabağlı olarsan ha?!

            O da gülə-gülə dedi ki, indi hamımız qarabağlıyıq, amma mən qazaxlıyam həm də. Və gülüşdük...

            ...Kərəmin dəvəti ilə onun aktyoru olduğu teatrda oynadığı bir neçə tamaşada iştirak etmiş, hətta esse də yazmışdım. Görkəmli fransız dramaturqu Jan Anuyun “Antiqona” faciəsinin tamaşasında onun oynadığı Keron rolu diqqətçəkəndir. İkinci Dünya savaşının ağır illərində yazılan bu əsərdə vəzifə hərisliyi, qardaş qırğını önə çəkilib. Tamaşadan təsirlənərək yazdığım yazıdan bir parçanı burada da vermək istədim:” Bir məqamı vurğulamalıyıq: Antiqona yeni çar Kreonun oğluna nişanlıdır. Kreon gözətçilərin həbs edib işgəncə verdiyi Antiqonanı onların əlindən alır və qızı dilə tutur ki, gələcək qaynatası olan çarın qərarına qarşı çıxmasın. Lakin Antiqonanı fikrindən döndərə bilmədikdə özü çılğına dönür, əlindəki əsası ilə qıza, sözün əsl mənasında işgəncə verir. Bu zaman əsərin əsas süjet xəttini təşkil edən bu iki aktyorun (Kərəm Hadızadə və Aygün Fətullayeva) oyunu  rəğbətlə izlənildi və sonda böyük alqış topladı...”

            Böyük ədibimiz Hüseyn Cavidin “Şeyx Sənan” faciəsinin əsasında hazırlanan tamaşada da Kərəm Hadızadənin oyunu ön planda idi. Düzdür, onun Papazı baş qəhrəman deyil, amma baş qəhrəman Şeyx Sənan boynuna saldığı xaçı onun əlindən alır...

            Kərəm bəyin baxışı, duruşu tam bir qafqazlı ədasıdır. Qafqaz insanının baxışı var Kərəmin göz bəbəklərində. O elə plastik aktyordur ki, qədim alpan türklərindən (alban türklərindən) tutmuş bütün qafqazlıların obrazını yaratmağa qadirdir. Özünün eniş dövrünü yaşayan Azərbaycan kinosu belə bir nadir aktyordan istifadə imkanlarını, təəssüf ki, əldə etməkdən çox uzaqdadır...

            Və bu günlərdə sosial şəbəkə xəbər verdi ki, gözəl aktyor, gözəl dost və gözəl insan Kərəm Hadızadənin 60 yaşı tamam olur...

            Düzünü deyim ki, inanmadım. Hətta özünə telefon açanda gülə-gülə dedi ki, ay qardaş, vallah mən özüm də inanmıram...

            İnansaq da, inanmasaq da, faktdır. Kərəm Hadızadəni bu böyük yubiley yaşı münasibəti ilə ürəkdən təbrik edirəm!

            Aktyoru olduğun teatrda hələ səni bir-birindən gözəl rollar gözləyir. Yaşa, yarat, tamaşaçılarımıza zövq aşılamaqda davam et.

            Sonda səni sevdiyimiz Cavid Əfəndinin misraları ilə bir daha qutlayıram:

 

            Böyüklükdə, mərhəmətdə seçilmiş,

             Alicənablıq boyuna biçilmiş...                      

             

                                                                                                          15.09.2025.