AZAD QARADƏRƏLİ GÜLLƏLƏR (“Nasirin şeir dəftəri” silsiləsindən)

                         

             AZAD QARADƏRƏLİ

                  GÜLLƏLƏR

            (“Nasirin şeir dəftəri” silsiləsindən)

                                                     Şairlər bağışlasın

 

              "Güllələr açılır

                          hər səhər-axşam,

            Biri də mənə dəyməyir..."

                        -Sevinmə buna!

            Dəyməyən güllədən

                        dəyən yaxşıdı.

            Olanını gizlicə yığıb aparandansa

                        Üz-üzə oturub

                         yeyən yaxşıdı -

            (Qaxılıb zırın-zırın ağlama,

            Genəlt ətrafını!..)

             Bunun yaxşısına lənət!

            Bunun... atdığı

                        öldürmür, amma

            Sinəsində qanımızla

                        döyməsi var,

            Döyməsi var,

                        söyməsi var...

            Düşmüşük felinə,

                        həm acı dilinə,

            Bizi söz-söz öldürür,

                        güllə-güllə qandırır,

            Sonra dərimizi

                        beş şahalıq edib,

            Öz əllərimizlə

                        yandırır...

            Tüstümüz

                        təpəmizdən çıxır,

            Dost yanıb yaxılır,

                        Düşmən üstümüzə yıxılır...

            ...Güllələr açılır hələ də,

            Bizə dəyməyən güllələr...

            Bizə

                        ölümü belə

                                qıymayan güllələr...

 

                                                       Oktyabr, 2016.