AZAD QARADƏRƏLİNİN ƏSƏRLƏRİNİN 10-CU CİLDİ ÇAPDAN ÇIXMIŞDIR

 

      AZAD QARADƏRƏLİNİN ƏSƏRLƏRİNİN 10-CU CİLDİ ÇAPDAN ÇIXMIŞDIR

 

 

         Yazıçı Azad Qaradərəlinin əsərlərinin 10-cu cildi çapdan çıxmışdır.

         Bu cildə müəllifin “Erməni doktorun gündəliyi və Qarabağın qara hekayətləri” romanı, bəzi hekayələri daxil edilmişdir. Kitabın annotasiya hissəsində yazılanlardan: “Romanda rastlaşacağınız insan surətlərini sizin tanıdığınız adamlarla eyniləşdirmək və bənzəyiş fərqinin az və ya çoxluğu  fikrindən vaz keçin. Unutmayın: fakt, sənəd, tarixi mənbə və ən başlıcası bir Suriya ermənisi olan doktorun yazdıqlarına əsaslanan müəllif, bir də öz baxış bucağını burada sərgiləmişdir. Məsələn, əsərdəki həqiqi adlarıyla verilən döyüşçülər – Baloğlan, Filman, yaxud Yaqub kişi (gündəlikdə adı həm də Mehdi kimi keçir) nə qədər realdırsa, Eldar, onun oğlu Yusif, əsirlikdə erməni polkovnikin tənasül alətini kəsən Azərbaycanlı qız, özünü şalı ilə asan ana bir o qədər reala qarışmış irrealdır.

            Romandakı gündəliyin yazarı, əli qanlı doktor Avanes Minasyan, daşnaksütunun liderlərindən Artaş, fransalı erməni qızı Alita, Qafanın  erməni “axçisi” Seda  həm həyati obrazlardır, həm müəllif təxəyyülünün məhsuldur.

            Və nəhayət, bu romanda gedən hekayətlər barədə. Romanın müəllifi nə qədər yazıçıdırsa, bir o qədər rayonu, kəndi, ev-eşiyi, məktəbi, kitabxanası dağıdılmış, yandırılmış bir tərəfdir, obrazdır həm də. Ona görə də, o sanki belə bir roman yazacağını fəhmlə bilb, qabaqcadan o qara hekayətləri qələmə alıb.

          Bu sətirlər və ümumən roman özü 44 günlük Vətən Müharibəmizdən əvvəl qələmə alınıb.

          Və cilddə bir neçə hekayə də verilmişdir ki, 44 günlük müharibənin ağrılarını və sevinclərini özündə birləşdirir. Ağrı və sevincin doğurduğu hekayələr...”     

          Qanun nəşriyyatında işıq üzü görən yeni cildin ön sözünün müəllifi filologiya elnləri doktoru, professor Bədirxan Əhmədli, redaktorları Lətif Şüküroğlu, tərtibçisi Türkan Azadqızıdır.

            Kitabı yaxın günlərdə M.F.Axundov adına Milli Kitabxanadan, AMEA-nın, ADPU-nun (əski APİ), Zəngilan rayonunun kitabxanalarından əldə edib oxumaq olar.