AZAD QARADƏRƏLİNİN ƏSƏRLƏRİNİN 13-CÜ CİLDİ ÇAPDAN ÇIXMIŞDIR

     

      AZAD QARADƏRƏLİNİN ƏSƏRLƏRİNİN 13-CÜ CİLDİ ÇAPDAN ÇIXMIŞDIR

 

 

         Yazıçı Azad Qaradərəlinin əsərlərinin 13-cü cildi çapdan çıxmışdır.

         Bu cildə müəllifin “Morqda karantin” romanı və bir neçə hekayəsi daxil edilmişdir.

         Cilddə yer alan “Morqda karantin” romanı “Morq çiçəkləri”nin davamı kimi qələmə alınıb. Uşaq xəstəxanasının morq şöbəsində yaşayan məcburi köçkünlərin acınacaqlı həyatı azmış kimi, bir yandan da koronavirus pandemiyası yayılır və karantin elan olunur. Yazıçı, baş nazirin müavini Rüzgar Metenin ailəsinin, yaxınlarının paytaxtı tərk edərkən karantinə düşmələri, uçub-dağılmaqda olan bir qədim karvansarada gecələmələri, bu zaman baş verən mistik hadisələr, qorxunc vaqeələr oxucunu alıb aparır. Əsərdəki hər iki xətt bir-biri ilə əlaqədardır – məlum olur ki, Morq məhəlləsində yaşayanların bir çoxu elə Rüzgar Metenin qohumları imiş.

            Roman bitəndən az sonra edebiyyat.az saytında hissə-hissə yayımlanmış, haqqında bir neçə məqalə çap olunmuşdur.   

             Kitabdakı hekayələrin də mövzusu koronovirus pandemiyası günlərində baş verən hadisələrdən qaynaqlanır. Burada da qəribə hadisələr, pandemiyanın yaratdığı mistik aura oxucunu tanış mənzərələrlə qarşılaşdıracaq. “Kaşğarlının göz yaşları”, “Göyərçinlər və qarğalar” hekayələrində əski zamanlardakı pandemiya ilə günümüzdəki koronavirus qarşılaşdırılmış, insanın zaman-zaman təbiətin sınağına çəkilməsi ön planda verilmişdir.

           Bu cildə daxil olan “Arəstə” uzun hekayəsində isə 44 günlük savaşda 3000 şəhidin yeganə bacısı Arəstə Baxışovanın döyüş yolundan bəhs olunur. O da maraqlıdır ki, Arəstə və onun qardaşları məhz pandemiya şəraitində düşmən üzərinə yeriyərək torpaqlarımızı yağılardan azad etdilər.

          “Yazıçı gözü, yazıçı sözü” rubrikasında isə müəllifin koronavirus pandemiyası günlərində bu təhlükəli virusa yoluxması, ona qarşı mübarizəsi və bu təcrübənin qələmə alınması əksini tapmışdır.

           Qanun nəşriyyatında işıq üzü görən yeni cildin redaktoru Vaqif Osmanlı, rəssamı Sehran Allahverdi, tərtibçisi Türkan Azadqızıdır.

            Kitabı yaxın günlərdə Milli Kitabxanadan (əski M.F.Axundov adına kitabxana), AMEA-nın, ADPU-nun (əski APİ), Folklor İnstitunun, Xəzər Universitetinin, Zəngilan rayonunun Mərkəzi kitabxanalarından əldə edib oxumaq olar.