AZAD QARADƏRƏLİNİN ƏSƏRLƏRİNİN 15-ci CİLDİ ÇAPDAN ÇIXMIŞDIR

 

 

      AZAD QARADƏRƏLİNİN ƏSƏRLƏRİNİN 15-Cİ CİLDİ ÇAPDAN ÇIXMIŞDIR

 

 

         Yazıçı Azad Qaradərəlinin əsərlərinin 15-ci cildi çapdan çıxmışdır.

         Bu cildə müəllifin “Bir qazinin yarımçıq gündəliyi”, “Baş nazirin frakı” romanları və səkkiz hekayəsi daxil edilmişdir.

         Cilddə yer alan hər iki roman müəllifin son illərdə qələmə aldığı əsərlərdəndir. Onu da deyək ki, romanlar sosial şəbəkədə - “Bir qazinin yarımçıq gündəliyi” yazıldıqdan az sonra edebiyyat.az saytında yayımlanmış, “Baş nazirin frakı” isə müəllifin şəxsi bloqu qaradereli.blogspot.com-da - oxucalara çatdırılmaqdadır.

            “Bir qazinin yarımçıq gündəliyi” adlı roman 44 günlük Vətən Müharibəsinin qazisi, dinc dövrdə Dövlət Sərhəd Xidmətinin zabiti kimi çalışmış gəncin gündəlik şəklində qeydləri əsasında qələmə alınıb. Müharibə bitdikdən sonra zabit Ermənistanla sərhəddə xidməti vəzifəsini yerinə yetirərkən minaya düşür və...

            Əsərin düyün nöqtəsi bu hadisədən qaynaqlanır. Daha sonra bir-birindən ilginc olaylar baş verir. Ən ağırı isə, təbii ki, atanın başına gələnlərdir. Min illərin problemi olan atalar və oğullar mövzusu, birbaşa olmasa da, bu romanın da nüvəsində özünə yer alıb. Birinci Qarabağ Müharibəsinin iştirakçısı olan ata ilə İkinci Qarabağ Müharibəsinin qəhrəmanlarından olan oğul arasında ata sevgisi, oğul istəyi açıq-aydın hiss olunsa da, gözəgörünməz bir ziddiyyət də var... (Qeyd etməyi lazım bilirik ki, əsərin obrazları olan zabit oğulun prototipi sağdır, müharibə qazisi kimi həyatını yaşamaqdadır, atanın prototipi isə, əsər bitəndən az sonra vəfat etmişdir.)

            Cildə daxil olan ikinci roman isə “Baş nazirin frakı” adlanır. Bu qəribə süjet xəttinə malik fantasmaqorik əsərdə ən pik nöqtə yazıçının birdən-birə ölkənin idarə edilməsinə gətirilməsi ilə başlayır. Prezident üsul-idarəsindən parlamentli respublika üsul-idarəsinə keçidlə özünü baş nazir kimi görən yazıçı gah ölkəni idarə edir, gah qələmə sarılıb əsər yazır, gah da öz dövlətçilik duyğularını dilə gətirir. Sonda məlum olur ki, dövlət idarəçiliyi də bir sənətdir və bununçün çox böyük yetənəklərə sahib olmalısan. Yazıçı isə olsa-olsa öz bədii əsərləri və publissistik çıxışları ilə bu işə töhfə vermiş olar.

            Mirzə Fətəli Axundovun “Aldanmış kəvakib” əsərinin yeni variantda ortaya çıxması kimi də xarakterizə edə bilərik bu əsəri - təbii, posmodern üslubun yansıması kimi.

            Cilddə yazıçının süjet “qohumluğu” olan iki hekayəsi də verilmişdir.

            Eyni zamanda “Ukrayna hekayələri” silsiləsindən üç hekayə də cilddə özünə yer almışdır.

             Qanun nəşriyyatında işıq üzü görən yeni cildin redaktoru Vaqif Osmanlı, tərtibçisi Türkan Azadqızıdır.

            Kitabı yaxın günlərdə Milli Kitabxanadan (əski M.F.Axundov adına kitabxana), AMEA-nın, ADPU-nun (əski APİ), Folklor İnstitunun, Xəzər Universitetinin, Zəngilan rayonunun Mərkəzi kitabxanalarından əldə edib oxumaq olar.